2020 jyldyń on aiynda Atyraý oblysynda 39 mln 300 myń tonna munai óndirildi. Bul týraly búgin Atyraý oblysynyń ákimi Mahambet Dosmuhambetov aitty, dep habarlaidy "Ult aqparat".
«Memleket basshysy Qasym-Jomart Toqaevtyń biylǵy Joldaýynda elimizdiń jáne óńirdiń órkendeýine qatysty naqty tapsyrmalar kórsetilgen. Bizdiń basty maqsatymyz - naqty júktelgen mindetterdi tabysty júzege asyrý. Atalǵan baǵyttar boiynsha Atyraý oblysynda irgeli jumystar jasalyp jatyr. Oblystyń jalpy óńirlik ónimi osy jyldyń qańtar-maýsymynda 3 trln 930 mlrd teńgeni qurady. Naqty kólem indeksi - 102,2 paiyz. Al respýblikanyń jalpy ishki ónimi kólemindegi oblystyń úles salmaǵy - 14 paiyz. Jan basyna shaqqandaǵy jalpy óńirlik ónim - 6 mln teńge», - dedi óńir basshysy Ortalyq kommýnikatsiialar qyzmetindegi baspasóz máslihatynda.
Osy rette ol Atyraý óńiriniń ekonomikalyq ózegi munai-gaz sektory ekenin basa aitty.
«Oblystaǵy ónerkásiptik ónimdegi onyń úlesi 88 paiyzdy quraidy. Biyl 10 aida 39 mln 300 myń tonna munai óndirildi. Bul Qazaqstanda óndirilgen jalpy munai kóleminiń 55 paiyzy degen sóz. Oblysta munai-gaz salasy boiynsha birqatar aýqymdy joba júzege asyrylyp jatyr. Solardyń eń irisi - keleshekte Teńiz ken ornyn keńeitý jobasy. Onyń jalpy quny 46 mlrd dollar. Bul joba munai óndirýdi jylyna 12 mln tonnaǵa arttyrýǵa múmkindik beredi»,- dedi Mahambet Dosmuhambetov.
Oblys basshysynyń aitýynsha, Teńiz ken ornyn keńeitý jobasyna úsh júzge jýyq qazaqstandyq kompaniia jumyldyrylǵan. Qazir 27 myń adam jumys istep jatqan irgeli jobany 2020 jyly iske qosý josparlanyp otyr.
«Jobanyń 80 paiyzy daiyn. Munai-gaz salasyndaǵy taǵy bir aýqymdy joba Qashaǵannyń da mańyzy kúnnen kúnge artyp keledi. Onda osy jyldyń 10 aiynda 12 mln 700 myń tonna munai óndirildi», - dedi Atyraý oblysynyń ákimi.
