Qazaqstanda kámeletke tolmaǵan 15 balasy bar 1 ǵana otbasy bar. Bul týraly QR Eńbek jáne jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Ózderińizde biletindei, ataýly áleýmettik kómekti reformalaý aiasynda 2020 jyldyń 1 qańtarynan bastap kópbalaly otbasylarǵa kiristerine qaramastan járdemaqy engizdik. 4 balasy barlarǵa 42 500 teńge, al odan ary 7 jáne odan kóp balasy bar otbasyna 74 myń teńge tólenedi. Iaǵni bir balaǵa 10 600 teńgeden beriledi. Kópbalaly analarmen, depýtattarmen talqylaý barysynda járdemaqyny odan ary saralaý qajet degen ortaq pikirge keldik. Taiaý ýaqytta Zańǵa túzetýler engizemiz. Zań aqpan ne naýryzda qabyldanǵannyń ózinde ol osy jyldyń qańtarynan bastap kúshine enedi. Endigi ýaqytta 8 balasy barlarǵa 74 myń emes shamamen 85 myń teńge, 9 balaǵa 96 myń, 10 balaǵa 106 myń jáne 15 balaǵa 159 myń teńge beriledi», - dedi ministr vedomstvonyń keńeitilgen alqa otyrysynan keiin.
Osy rette ministr mundai qadamǵa nelikten barǵandyqtaryn túsindirip berdi.
«Óńirlerge barǵanda jasy kámeletke tolmaǵan 12 balasy bar ana nelikten 7 balasy bar analarmen birdei járdemaqy alatyndyǵyn suraǵan edi. Sondyqtan ádiletti bolý kerek shyǵar. Eń kóbi 15 balamen toqtadyq. Bizde Soltústik Qazaqstan oblysynda kámelettik jasqa tolmaǵan 15 balasy bar bir ǵana otbasy bar. 8 jáne odan da kóp balasy bar otbasylardyń sany – 2 451», - dedi ol.
