Qazaqstanda mádeniet salasynda 1 mln-nan astam balany qamtityn mádeni jobalar qolǵa alynǵan. Bul týraly QR Mádeniet jáne sport ministri Dáýren Abaev Úkimet otyrysynda aitty, dep habarlaidy QazAqparat.
«Mádeniet jáne sport ministrligi «Balalar jylyn» ótkizý aiasynda berilgen barlyq tapsyrma men mindetter boiynsha belsendi jumys atqaryp jatyr. Barlyq jumys balalardyń sapaly jáne qoljetimdi bilim alýyn, shyǵarmashylyq turǵydan tolyqqandy damýyn qamtamasyz etýge, olardyń sporttyq jáne shyǵarmashylyq áleýetin arttyrýǵa baǵyttalǵan», - dedi Abaev.
Onyń aitýynsha, mádeniet salasynda 1 mln-nan astam balany qamtityn birneshe iri joba qolǵa alynǵan.
«Atap aitqanda, respýblikalyq «Ulaǵatty urpaq» mádeni-bilim berý onlain jobasy qolǵa alyndy. Joba saittar men áleýmettik jelilerde júrgiziledi. Qazirgi tańda qaralym sany 986 myńǵa jetip otyr, jyl sońyna deiin 2 mln qaralymǵa barady dep kútilýde. Bul óte aýqymdy qyzyq joba. Oqýshylar úiden shyqpai-aq, virtýaldy saiahat jasap, opera, balet, drama óneriniń úzdik úlgilerin tamashalap, qazaqstandyq jáne sheteldik filmder men mýltfilmderdi kóre alady. Dárisker retinde belgili mádeniet jáne óner qairatkerleri, shyǵarmashylyq JOO-lardyń professorlyq-oqytýshylyq quramy 20 saitqa 5 baǵyt boiynsha eki tilde ázirlengen 402 beinesabaq tolyq engizildi. Mysaly, mýzykalyq óner, kinematografiia, beineleý óneri, teatr jáne Kieli Qazaqstan týraly», - dep túsindirdi ministr.
Sonymen birge «Oqýshynyń mádeni normativi» jobasy elimizdegi 1510 mektepke engizilgen. Bul jalpy mektepterdiń 20%-yn quraidy. Jyl sońyna deiin bul kórsetkishti 30%-ǵa jetkizý josparlanǵan.
«Balalar ádebietine arnalǵan «Dana bala» (www.danabala.kz) veb-saitynda qazir 100-den astam qazaqstandyq avtordyń kitaptary toptastyrylǵan. Jyl sońyna deiin saitqa 5000 kitap ornalastyrylady. Bul – balalarǵa arnalǵan jalǵyz elektrondy kitaphana.
Odan bólek, balalar shyǵarmashylyǵyna arnalǵan «Talanttar aramyzda» respýblikalyq festival-kórme ótkizildi. Festival qorytyndysy boiynsha balalarǵa 16 nominatsiia berildi. Ahmet Baitursynuly atyndaǵy úzdik oqýshy, Qadyr Myrzaliev atyndaǵy úzdik aqyn, Álkei Marǵulan atyndaǵy úzdik arheolog, Asqar Jumadildaev atyndaǵy úzdik ónertapqysh, Quman Tastanbekov atyndaǵy úzdik akter, Bibigúl Tólegenova atyndaǵy úzdik ánshi, Dina Nurpeiisova atyndaǵy úzdik kúishi, Qajymuqan Muńaitpasov atyndaǵy úzdik sportshy diplomdary berildi», - dedi ministr.
Al «Ájemniń ertegileri» onlain-jobasy 31 myń balany qamtidy. Jyl sońyna deiin bul kórsetkish 40 myńǵa jetedi dep josparlanyp otyr.
Balalar shyǵarmashylyǵyna arnalǵan «Meiirim» inkliýzivti festivalinde erekshe bilim berýdi qajet etetin balalar úshin saz balshyq terapiiasy, kiiz basý, intýitivti jivopis, plastilin syndy 6 baǵytta sheberlik synyptary uiymdastyrylady.
«Balalardy qorǵaý kúnine orai «Jazǵy kino» aýqymdy áleýmettik jobasy bastaldy. Jaz boiy kóp balaly, kómekke muqtaj, áleýmettik az qamtylǵan otbasylardyń balalary men jasóspirimderge tegin kino kórsetilimder uiymdastyrylady. Bul «Qazaqkontsert» memlekettik kontserttik uiymynyń jobasy jáne «Qazaqfilm» AQ, «Ulttyq kinony qoldaý ortalyǵy» AQ-men birge júzege asyrylady», - dedi Dáýren Abaev.
