Osy aidyń basynan bastap Qazaqstanda Armeniiadan ákelingen 2 myń avtokólik tirkeldi, dep habarlaidy QazAqparat.
«Ishki ister ministrligi osy jyldyń 1 maýsymynan bastap bizdiń azamattarymyzdyń Armeniiadan ákelgen kólik quraldaryn tirkeý boiynsha jumystardy júrgizýde. Alǵashqy eki aptada 2 myńnan astam avtokólik tirkeldi. Tirkeý basym kópshiligi – eldiń batys aimaqtarynda. Respýblikadaǵy barlyq tirkeýdiń jartysynan kóbi Aqtóbe, Atyraý, BQO jáne Mańǵystaý oblystarynyń úlesine keledi», - dedi QR Ishki ister ministrligi Ákimshilik politsiia komiteti tóraǵasynyń orynbasary Serik Túsipov OKQ-da «QR azamattary Armeniiadan ákelgen avtomobilderdi tirkeý týraly» taqyrybynda ótken baspasóz máslihatynda.
IIM ókiliniń aitýyna qaraǵanda Armeniiadan ákelingen kólikterdi tirkeý rásimi óte qarapaiym ári ol azamattardan kóp ýaqytty talap etpeidi.
«Tirkeý sharttary men kólikterge qoiylatyn talaptarǵa keler bolsaq, olar barynsha ońai jasalǵan. Naqty talaptarǵa toqtalsaq, tirkeýge – Armeniianyń jaýapty organdarynda Qazaqstan azamattarynyń atyna 2020 jyldyń 1 aqpanyna deiin jazylǵan kólikter jatady. Kólik tek satyp alǵan sol kóliktiń iesiniń atyna ǵana tirkeledi. Senimhat nemese saqtandyrý polisi arqyly minip júrgen adamdardyń atyna kólik tirkelmeidi. Sebebi olar zań júzinde avtokólikterdiń iesi emes. Dese de, saqtandyrý polisi arqyly mundai sanattaǵy kólikti basqa bireýdiń basqarýyna berýge bolady», - dedi Serik Túsipov.
