Memleket basshysy Nursultan Nazarbaev Zimbabve Respýblikasynyń Prezidenti Emmerson Mnangagvanyń resmi saparynyń qorytyndysy boiynsha buqaralyq aqparat quraldary ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Nursultan Nazarbaev BAQ ókilderi aldynda sóilegen sózinde bul sapardyń 1992 jyly Qazaqstan men Zimbabve arasynda diplomatiialyq bailanystar ornatylǵannan beri alǵash ret júzege asyrylǵanyn atap ótti.
– Búgingi kezdesýdiń eki el arasyndaǵy, sondai-aq Ortalyq Aziia men Ońtústik Afrika óńirleriniń ózara qatynastaryn nyǵaitý úderisindegi tarihi mańyzy zor, – dedi Memleket basshysy.
Qazaqstan Prezidenti eki jaqty kezdesý barysynda saiasi dialogty qoldaý jáne saýda yntymaqtastyǵyn keńeitý jónindegi ýaǵdalastyqtarǵa qol jetkizilgenin aitty.
– Jekelegen baǵyttar boiynsha ózara qarym-qatynas ornatýǵa múmkindikter mol. Bizdiń elderimiz arasynda keibir uqsastyqtar bar. Zimbabve de Qazaqstan siiaqty paidaly qazbalarǵa óte bai. Aýyl sharýashylyǵy salalarymyz da birdei damýda. Qazaqstan taý-ken ónerkásibinde yntymaqtastyq ornatý jáne tájiribe almasý, Zimbabvege aýyl sharýashylyǵy ónimderin jetkizý máselelerin qarastyrýǵa ázir, – dedi Nursultan Nazarbaev.
Memleket basshysy Zimbabve aýmaǵynda paidaly qazbalar óndirý salasynda ózara yqpaldastyq ornatýdyń múmkindikterine toqtaldy.
Sondai-aq, Qazaqstan Prezidenti Zimbabveniń kólik-logistika jelisin jańǵyrtý jáne qaita óńdeý isinde birlesken jobalardy iske asyrý jónindegi yntymaqtastyqtyń áleýeti zor ekenin atap ótti.
– Jahandyq kún tártibindegi kóptegen basty máseleler boiynsha oi-pikirlerimiz sáikes keledi. Biz Qazaqstannyń halyqaralyq bastamalaryna Harareniń qoldaý bildirgenin joǵary baǵalaimyz, – dedi Nursultan Nazarbaev.
Memleket basshysy kelissózder nátijesinde taraptar Birikken Ulttar Uiymy aiasynda birlesken jumystar men ózara qoldaý jónindegi qalyptasqan tájiribeni jalǵastyrýǵa bailanysty nietterin maquldaǵanyn aitty.
– Biz Qazaqstan baqylaýshy el bolyp sanalatyn Afrika Odaǵy aiasyndaǵy tyǵyz yntymaqtastyqty ilgeriletý jóninde ýaǵdalastyq. Jalpy, Emmerson Mnangagvanyń Astanaǵa alǵashqy resmi sapary eki memlekettiń túrli salalardaǵy tyǵyz qarym-qatynastardy odan ári damytýǵa múddeli ekenin kórsetip otyr, – dedi Qazaqstan Prezidenti.
Nursultan Nazarbaev sapar barysynda qol jetkizilgen ýaǵdalastyqtar túrli baǵyttaǵy ózara yntymaqtastyqty damytýǵa oń serpin beretinine senim bildirdi.
Zimbabve Respýblikasynyń Prezidenti Qazaqstannyń ulttyq ekonomikany damytý jáne jańǵyrtý jónindegi tájiribesin qoldanýǵa múddeli ekenin atap ótti.
– Zimbabveniń qazirgi damýy Qazaqstannyń osydan 20 jyl burynǵy deńgeiine sáikes keledi. Biz dostas eldiń 27 jyl boiy óz ekonomikasyn qalai órkendetkeni jóninde úirenýimiz kerek. Qazaqstannyń mundai jetistikke jetkenine súisinemiz ári osyndai damý jolymen júrýge umtylamyz, – dedi Emmerson Mnangagva.
Zimbabve Respýblikasynyń Prezidenti Qazaqstannyń Ulttyq ál-aýqat qoryn damytý jáne «Astana» halyqaralyq qarjy ortalyǵyn qurý jónindegi tájiribesin atap ótti.
Sonymen qatar, Emmerson Mnangagva Zimbabveni Qazaqstannyń úlgisimen Ońtústik Afrikadaǵy kólik-logistikalyq hab retinde damytýdyń mańyzdylyǵyna toqtaldy.
Sońynda Zimbabve Prezidenti qaýipsizdikti saqtaý jáne iadrolyq qarýsyz álem qurý jónindegi Qazaqstannyń halyqaralyq bastamalaryn qoldaitynyn aitty.
