Qazaqstan jyl basynan beri eksportqa 1 219 avtomobil jóneltti. Bul jaiynda Qazaqstan avtobiznes qaýymdastyǵynan málim etti, dep habarlaidy "Ult aqparat".
Qaýymdastyq aqparatyna sáikes, otandyq mashina jasaýshylary avtomobil shyǵarýyn eselei túsýde. 2019 jyldyń shilde aiynda barlyq úlgidegi 4 064 kólik quraly shyǵarylyp, avtoónerkásiptiń naryqtyq úlesi sol aida 61 paiyzǵa jetken. Bul jyl ishindegi rekordtyq kórsetkish sanalady. Jeńil avtomobil jasaýmen qatar Qostanaida Ankai men Yutong avtobýstaryn qurastyrý da qarqyn alyp keledi. Buǵan qosa, elimizdegi jalǵyz avtojasaýshy – eksporttaýshy «SaryarqaAvtoÓnerkásip» kásiporny shilde aiynda Resei naryǵyna 694 JAC krossoverin jóneltti. Jalpy jyl basynan beri eksportqa 6 512 mln teńgeniń dál osy markadaǵy 1 219 kóligi jiberilgen bolatyn.
Qazaqstan avtobiznes qaýymdastyǵynyń derekterine sáikes, 2019 jyldyń 7 aiynda elimizde 24 687 kólik quraly jasaldy. Onyń ishinde 22 280 jeńil kólik, 1 196 júk kóligi, 754 avtobýs, 422 tirkeme men jartylai tirkeme jáne 35 basqa da mamandandyrylǵan tehnika bar.
Shilde aiynda otandyq mashina jasaýshylar shyǵarǵan ónimniń quny 26 492 mln teńgeni qurady. Bul bir ai burynǵy nátijeden 12,1 paiyzǵa tómen. Degenmen, 7 aidyń jiyntyq nátijesi ótken jyldyń dál osyndai kezeńindegi kórsetkishten 65,1 paiyzǵa kóp.
