QR Bilim jáne ǵylym ministri Ashat Aimaǵambetov joǵary oqý oryndarynyń akademiialyq derbestigi boiynsha birqatar usynysyn jariialady, dep habarlaidy "Ult aqparat".
«Prezident Qasym-Jomart Toqaev ministrlikke joǵary oqý oryndarynyń akademiialyq derbestigin odan ári keńeitý boiynsha jumys júrgizýdi tapsyrdy. 2018 jyly zań qabyldanyp, joǵary oqý oryndaryna akademiialyq jáne basqarýshylyq erkindik berildi.
Osy zań jobasyna jaýapty bola otyryp, ony qabyldaýdyń qandai mańyzdy qadam bolǵanyn bilemin. Búgin 2 jyldan keiin osy baǵytta jumys isteý qajettigin kórip otyrmyz.
Ministrlik joǵary bilim berý júiesin odan ári jańǵyrtý jáne onyń básekege qabilettigin arttyrýǵa negiz bolatyn joǵary bilim berýdi damytý jónindegi daǵdarysqa qarsy jospar usynady», - dep jazdy ministr Facebook-tegi paraqshasynda.
Onyń aitýynsha, úsh qadamnan turatyn jospardy ázirleý úshin saraptamalyq top qurylǵan, bul top naýryz aiynan beri talqylaýdy ótkizip keledi.
«Alǵashqy qadam – bilim berýge biznes pen óndiris ókilderin, sheteldik oqytýshylardy tartýdy, óńiraralyq deńgeide mamandar almasýyn yntalandyrý mańyzdy. Bilim berý stýdentti naryq shyndyǵyna daiyndaýǵa, odan qalys qalmaýǵa barynsha tyrysýy tiis.
Osyǵan bailanysty dárejelik, shtattyq jáne bazalyq bilim berý jónindegi talaptardy qaita qaraý qajet dep sanaimyn. Bul ólshemderdi joiý mindeti turǵan joq, biraq olar joǵary oqý oryndarynyń erkindigin shektemeýi kerek. Atap aitqanda, Meiramhana isi, Esep, Týrizm, Qyzmet kórsetý, Qarjy, IT, Jýrnalistika, Qoǵammen bailanys, Standarttaý jáne sertifikattaý syndy oqytý baǵyttary boiynsha dárejelik jáne shtattyq talaptardyń mańyzy joq jáne oqytýǵa praktikterdi tartýdy qiyndatady», - deidi vedomtsvo basshysy.
Sonymen birge, ministr dástúrli kúndizgi oqýmen birge qashyqtan nemese aralas oqý túrin tańdaý múmkindigin engizýdi usyndy.
«Naqty formany tańdaý stýdentke júkteledi. Usynylǵan oqý túri kóktemdegi jaǵdaidan ózgeshe bolady, óitkeni bastapqyda-aq qashyqtan oqytý formasy ýaqytsha sheshim retinde engizilgen edi. Árine, bul jumysty oqytýshylardy oqytýmen jáne bilim berý baǵdarlamalaryn jańartýmen úilestirý qajet. Qashyqtan oqytý formasyn tolyq beiimdeý úshin zańnamalyq ózgerister qajet. Sondai-aq, jalpy bilim berý pánderi (JBP) tsikli boiynsha tiptik oqý baǵdarlamalaryn shekti etý, olardy JBP igerý qorytyndylary boiynsha qol jetkizilýi tiis oqytý nátijelerin naqty tujyrymdaý usynylady. Qazir tiptik baǵdarlamalarda nátijelerdi ǵana emes, olarǵa qol jetkizý ádisteri de sipattalady. Ministrlik buǵan aralaspaýy kerek, akademiialyq erkindik tolyqqandy bolýy tiis», - dedi A. Aimaǵambetov.
