2022 jyly respýblikalyq mańyzy bar joldardyń 91% jáne jergilikti joldardyń 85% normativtik jaǵdaiǵa keltirý josparlanǵan. Bul týraly Premer-Ministr Álihan Smaiylov aitty, dep habarlaidy QazAqparat.
«Qazaqstandaǵy avtomobil joldary jelisiniń jalpy uzyndyǵy shamamen 96 myń shaqyrym. Jol kólik qatynasyn damytý úshin sońǵy jyldary aýqymdy jumys atqaryldy. «Batys Eýropa – Batys Qytai» kólik dáliziniń qurylysy boiynsha joba iske asyryldy. 2 myń shaqyrymnan astam jol aqyly júiege kóshti. Bul – jol infraqurylymyn ózin-ózi qamtamasyz etý boiynsha halyqaralyq ozyq tájiribe», - dep atap ótti Premer Úkimet otyrysynda.
Degenmen Úkimet basshysy aqyly júiege aýysyp jatqan joldardyń jaǵdaiyna qatysty halyqtyń shaǵymy da bar ekenin aitty. Sondyqtan «QazAvtoJol» kompaniiasy joldardy kútip-ustaý sapasy men qaýipsizdigi boiynsha jumysty kúsheitýi qajet.
«Jalpy avtojoldardy damytý «Qýatty óńirler – el damýynyń draiveri» atty ulttyq jobasy aiasynda júzege asýda. Ulttyq jobaǵa sáikes, 2022 jyly respýblikalyq mańyzy bar joldardyń 91% jáne jergilikti joldardyń 85% normativtik jaǵdaiǵa keltirý josparlanǵan. Ol úshin jalpy uzyndyǵy 4,3 myń shaqyrym avtojoldy qaita jańǵyrtý jáne jańa joldar salý boiynsha iri jobalar iske asady», - dedi Álihan Smaiylov.
Sonymen qatar jol boiyndaǵy 1110 qyzmet kórsetý nysanyn tiisti standartarǵa sáikestendirý jumystary júredi. Bul rette qabyldanyp jatqan sharalarǵa qaramastan, birqatar problemalyq máseleler bar. Onyń eń negizgisi – joldardyń, ásirese, jergilikti jerdegi joldardyń nasharlyǵy.
«Dúniejúzilik ekonomikalyq forýmnyń derekteri boiynsha, Qazaqstan jol sapasy jaǵynan álemde 93-shi orynda. Memleket basshysy Qasym-Jomart Toqaev joldardyń nashar jaǵdaiyn birneshe ret aitty. Árbir ákim óńirdegi joldardyń jai-kúiine tikelei jaýapty ekenin atap ótkim keledi. Buǵan qosa, bilikti kadrlar jetispeidi. Jol-kólik infraqurylymyn jobalaý jáne salý kezinde jańa qurylys materialdary men zamanaýi tehnologiialar az qoldanylady. Bul joldardyń sapasy men olardy jóndeý jáne salý merzimine de áser etedi. Indýstriia ministrligi osy máselelerdi pysyqtaýy qajet», - dedi Premer-Ministr.
