Qazaqstan jáne Britan Parlamentaralyq yntymaqtastyq jónindegi toptardyń jetekshileri onlain kezdesip, qos eldiń koronavirýsty eńserýi jáne Breksitten keiingi áriptestik taqyryby boiynsha oi bólisti.
Sonymen qatar britaniialyq Lordtar jáne Qaýymdar palatasynyń depýtattary Qazaqstan Prezidenti Qasym-Jomart Toqaevtyń 2 jylda atqarǵan reformalaryna baǵa berdi, dep habarlaidy "Ult aqparat".
Ian Makkenzi Maknikol - Ulybritaniia parlamenti joǵary palatasynyń múshesi, leiborshylar partiiasynyń ókili. 51 jastaǵy lord Londonnyń ońtústik-shyǵysynda turady. Pandemiia bastalǵaly metrony qoiyp, parlamentke velosipedpen qatynai bastaǵan.
«Ulybritaniia astanasynda velosipedshilerge barlyq jaǵdai jasalǵan. Oǵan qosa velosipedtiń qorshaǵan ortaǵa esh ziiany joq», deidi saiasatker.
Búgin de ol qazaqstandyq áriptesterimen onlain-kezdesýge temir tulparymen kelip, ekologiialyq problemalar taqyrybyn qozǵady.
«Klimattyq daǵdarys baǵytynda birlese jumys isteýge kóp múmkindikter bar. Birikken Koroldik jáne Qazaqstan Respýblikasynyń úkimetteri birlese otyryp, joǵary nátijelerge jetkize alady», - deidi lord.
Elderdiń kovidpen kúrestegi jetistikteri de basty taqyryptardyń birine ainaldy.
Ulttyq statistika qyzmetiniń málimetterinshe, britaniialyqtardyń 80 protsentiniń aǵzasynda antideneler bar. Olar aýyryp shyǵýdyń nemese vaktsinalaýdyń nátijesinde túzilgen. Britaniialyq parlamentariiler Qazaqstanda shyǵarylǵan ekpeniń bolashaǵyna zor úmitpen qaraityndyqtaryn aitty.
«Bizdiń bilýimizshe, Qazaqstan otandyq vaktsinasyn shyǵardy. Bul Ortalyq Aziia memleketteri úshin úlgi bolarlyq óte jaqsy jańalyq. Ekpeni ári qarai jetildirý úshin ǵalymdardy jumyldyrý, áleýetti investorlardy habardar etý jaǵynan qoldaý bildirýge ázirmiz» - dedi Ulybritaniia Parlamenti Qaýymdar palatasynyń depýtaty, Qazaqstanmen yntymaqtastyq jónindegi jalpypartiialyq parlamenttik toptyń tóraǵasy polkovnik Bob Stiýart.
Onyń qazaqstandyq áriptesi, QR Parlament Májilisiniń depýtaty Vakil Nabiev: «Memleket pandemiia kezinde shamamen 15 mlrd AQSh dollaryn, iaǵni Ishki jalpy ónimniń 9 protsentin halyqty jáne biznesti qoldaý úshin bóldi. Biz koronavirýske qarsy kúreste halyqaralyq qaýymdastyqpen, onyń ishinde britaniialyq áriptesterimizben de birlese jumys isteýge ázirmiz», - dep túiindedi.
Depýtattar Qasym-Jomart Toqaev prezidenttiginiń eki jylyn saralai kele, onyń saiasi reformalaryn da talqylady. Ásirese, aimaq ákimderin sailaý týraly bastamasyna erekshe toqtaldy.
«Birikken Koroldikte merlerdi sailaý dástúri ejelden qalyptasqan. Sizderde sailaý ótkennen keiin, aimaq basshylary ózara kezdesip, tájiribe almasýlaryna bolady dep oilaimyn», dedi Ulybritaniia Qaýymdar palatasynyń depýtaty Martin Vikkers.
Ulybritaniia Breksitten keiin Eýroodaq elderimen bailanysyn úzgen emes. Biraq jańa memlekettermen tikelei qarym-qatynas ornatý baǵytynda da jumys istep jatyr. Qazirdiń ózinde 70 elmen saýda-sattyq boiynsha kelisimge keldi. Jiynǵa qatysýshylar Qazaqstan bul tizimge 71-shi bolyp enedi degen senim bildirdi.
