Niý-Iork qalasynda Qazaqstan Respýblikasy men Marshall Araldary Respýblikasynyń BUU janyndaǵy turaqty ókilderi Qairat Omarov pen Amatlain Elizabet Kabýa eki el arasynda diplomatiialyq qatynas ornatý týraly birlesken kommiýnikege qol qoidy, dep habarlaidy "Ult aqparat" QR Syrtqy ister ministrligine silteme jasap.
Kezdesý kezinde eki eldiń ókilderi BUU aiasynda ózara qoldaý, sonyń ishinde uiymdy reformalaý máselelerin talqylady. BUU-nyń ornyqty damý maqsattaryna jáne klimattyń ózgerýine bailanysty máselelerge de erekshe mán berildi. Qazaqstan Respýblikasynyń elshisi Qairat Omarovtyń aitýynsha, birlesken kommiýnike el arasyndaǵy ekijaqty formattaǵy jáne halyqaralyq uiymdardyń sheńberinde túrli salalardaǵy qatynasty damytýǵa múmkindik berip otyr.
«Al Amatlain Elizabet Kabýa Qazaqstannyń klimat ózgerýimen kúres jáne balamaly energiia kózderine kóshý sharalaryna belsendi qatysyp otyratyny úshin alǵys bildirdi. Ol Astanada «EKSPO-2017» halyqaralyq mamandandyrylǵan kórmesi aiasynda ótken Marshall araldarynyń ulttyq kúni is-sharasyna jeke qatysqanyn da atap ótti. Marshall araldarynyń turaqty ókili iadrolyq qarýdy taratpaý salasyndaǵy Qazaqstan jáne onyń Prezidenti Nursultan Nazarbaevtyń beibit halyqaralyq bastamalaryna qoldaý bildirip, osy salada odan ári yntymaqtastyqqa daiyn ekenin aitty. Iadrolyq synaqtardan zardap shekken Marshall araldary, Qazaqstannyń jahandyq deńgeide osy synaqtarǵa tyiym salý týraly bastamasyn tolyǵymen qoldaidy», - delingen resmi habarlamada.
Aita keteiik, Marshall Araldary Respýblikasy - Tynyq muhitynyń batys bóliginde ornalasqan memleket. Halyq sany shamamen 57 myń adam. 1986 jyly Amerika Qurama Shtattarymen erkin kelisimshart negizinde táýelsizdik aldy. 1947-1962 jyldar aralyǵynda memlekettiń araldarynda iadrolyq synaqtar júrgizildi. 1954 jyly AQSh Bikini atollda sýtegi bombasyn alǵash ret synaqtan ótkizdi. Jarylys araldy tolyǵymen joiyp jiberdi.
Ekonomikasynyń negizin quraityn salalar - tabiǵi aýyl sharýashylyq ónimderi, kopra ónimderin eksporttaý jáne AQSh-tan alatyn qarjylai kómek. Valiýtalyq túsimderdiń úlken bóligi - týrizmnen kelip túsetin kiris.
Eldiń basty problemalarynyń biri - jahandyq klimattyń ózgerýi. Bul - teńiz deńgeiiniń kóterilýi, jaǵalaýdaǵy eroziia, tuzdy sýdyń topyraqqa enýi, qurǵaqshylyq pen sý tasqyny, tsiklondar men daýyldar.
