Energetika ministri Qanat Bozymbaev otandyq benzindi eksportqa shyǵarý merzimin atady, dep habarlaidy Sputnik Qazaqstan agenttigi.
"Osy aidan bastap Eýraziialyq ekonomikalyq odaq arqyly benzin eksportyn jasaýǵa jol ashyldy. Jaqyn kúnderi qazaqstandyq benzinniń alǵashqy partiiasyn alys shetelge jiberý josparlanyp otyr", - dedi Bozymbaev esep berý kezdesýinde.
Ministr eksporttyń kólemin de atap ótti. Máselen, shetelge shyǵarylatyn AI-92 markaly benzin 60-70 myń tonna bolsa, AI-95-tiń kólemi bastapqyda 10-15 myń tonna shamasynda bolady. Qazirgi kezde sheteldik kontragenttermen qazaqstandyq benzindi jetkizý jóninde kelisimshart jasalyp jatyr.
Ministrdiń aitýynsha, búginde Eýraziialyq ekonomikalyq odaq aiasynda keibir memleketter qazaqstandyq munaidy óz zaýyttarynda óńdeýge múddeli. Olar benzin satyp alýdy da kózdeidi. Osyǵan bailanysty Qazaqstan óziniń naqty talaptaryn qoiǵan.
"Eýraziialyq ekonomikalyq odaq aiasyndaǵy seriktesterimiz – Belarýs pen Qyrǵyzstan qazaqstandyq munai men munai ónimderin satyp alýǵa múddeli. Biraq biz naqty talaptarymyzdy qoidyq. Sebebi búginde odaq aiasynda jetkiziletin taýarlarǵa baj salyǵy salynbaidy. Ondaida alypsatarlyq áreketterge jol berilýi múmkin. Bul degenimiz, ol taýarlarǵa aqsha qosyp, basqa elderge satyp jiberedi. Osyǵan bailanysty biz arnaiy kelisimderge qol qoiyp, ol qujattarda barlyq máseleni eskeremiz. Kelissózder sátti aiaqtalady degen senim bar", - dep atap kórsetti Bozymbaev.
Ministrliktiń málimetine sáikes, qazaqstandyq munai ónimderin Qyrǵyzstan, Ózbekstan, Tájikstan, Aýǵanstan men Shyǵys Eýropa elderine jetkizý josparlanǵan.
