Memleket basshysy Qasym-Jomart Toqaev Euronews-ke bergen suqbatynda Reseimen qarym-qatynasty odan ári damytý máselesine toqtaldy, dep habarlaidy Sputnik agenttigi.
Prezident óz qyzmetine kiriskennen keiin eki aptadan soń nege Reseige barǵanyn aitty.
"Ózimniń alǵashqy sheteldik saparymdy Reseiden bastaýym oryndy dep oilaimyn. Munda meni Resei Prezidenti shaqyrǵan bolatyn. Bizdi qurlyq boiynsha álemdegi eń uzyn shekara bailanystyryp ári bólip tur", - dedi Toqaev Euronews-ke.
Ol Máskeýde mańyzdy kelissózder júrgizilgenin atap ótti.
"Biz birlesken málimdemege qol qoidyq. Siz aitqandai qandai da bir kepildikke bailanysty Resei Prezidenti tarapynan talap qoiylǵan joq. Óitkeni áriptestikti nyǵaitýdyń ortaq túsinigi bar. Men Qazaqstan úshin Resei mańyzdy seriktes dep oilaimyn. Óitkeni úlken memleket, bizdiń kórshimiz, BUU Qaýipsizdik keńesiniń turaqty múshesi. Alaida Resei de Qazaqstansyz basqasha bolady dep oilaimyn", - dedi prezident.
Eske sala ketsek, Qasym-Jomart Toqaev 20 naýryz kúni memleket basshysy qyzmetine kirisken bolatyn.
Sáýir aiynyń basynda resmi saparmen Reseige bardy.
9 maýsym kúni Qazaqstanda prezident sailaýy ótti. Qasym-Jomart Toqaevty qazaqstandyqtardyń 70,96%-i qoldady.
Sailaýdan keiingi birinshi baspasóz máslihatynda Toqaev Qazaqstan Reseimen áriptestikti nyǵaitýdy jalǵastyratynyn aitqan bolatyn.
