Qazaqstan Ulttyq banki alaiaqtardan saq bolýǵa shaqyrady

Qazaqstan Ulttyq Banki alaiaqtardyń kóbeigenin eskertedi. Olar qandai da bir alaiaqtyq áreket boiynsha istiń mán-jaiyn anyqtamaq bolyp, ózderin QUB qyzmetkeri retinde tanystyrý arqyly qazaqstandyqtardyń derbes derekterin alýǵa tyrysady, dep habarlaidy "Ult aqparat".

Alaiaqtar telefon arqyly túrli syltaý keltirip, azamattardy derbes mobildi qurylǵysyna ekinshi deńgeili banktiń mobildi qosymshasyn nemese qashyqtan basqarýǵa arnalǵan servisti ornatýǵa úgitteidi. Sodan keiin qaskóiler smartfondy qashyqtan tolyq basqarýǵa múmkindik alyp, shot ashady, nesie rásimdeidi jáne aqshalai urlaidy. Atap ótetin jait, alaiaq telefon shalǵanda áńgime arasynda derbes ári jabyq derekterdi (shotta saqtaýly somany, SMS pen CVV kodtardy) berýdi talap etedi.

Paidalanýshynyń derbes derekterine qatysty kez kelgen aqparatqa qol jetkizý úshin qaskóiler neshe túrli qiturqy áreketterge barady, sonyń ishinde jalǵan qujattardy usynýǵa da beiim bolady. Iaǵni olar QUB qyzmetkeriniń jeke basyn rastaityn qujattardy, sondai-aq Qazaqstan Respýblikasy azamattarynyń qarajatymen jasalatyn aqshalai operatsiialarǵa tán hattardy nemese anyqtamalardy qoldan jasaidy.

Alaiaqtardyń túpki maqsaty – qolǵa túsirgen derekter arqyly aqsha jymqyrý jáne azamattarǵa aýqymdy materialdyq zalal keltirý.

Esińizde bolsyn, Qazaqstan Ulttyq Banki:

• jeke tulǵanyń shotyna qyzmet kórsetpeidi, jeke tulǵalarmen aqshalai esep aiyrysýlar men mámileler jasaspaidy;
• QR azamatynyń shotyna qatysty qandai da bir alaiaqtyq áreket, derbes derekterdiń jariia etilýi jáne ekinshi deńgeili bankterde nesie resimdeý sekildi máseleler boiynsha jeke tulǵalarǵa qońyraý shalmaidy;
• QUB-taǵy shottar tek qana Ulttyq Banktiń, ekinshi deńgeili bankterdiń jáne sany shekteýli zańdy tulǵalardyń operatsiialaryn esepke alý úshin ashylýy múmkin.

«Ulttyq Banktiń» atynan kúdikti hattar alsańyz nemese osyǵan uqsas qońyraý qabyldasańyz quqyq qorǵaý organdaryna habar bergen abzal.