Gýmanitarlyq qyzmet – Qazaqstannyń syrtqy saiasi strategiiasynyń mańyzdy baǵyty. Elimiz túrli sebepterge bailanysty kúrdeli gýmanitarlyq jaǵdaiǵa tap bolǵan memleketterdiń halqyna árqashan múmkindiginshe kómek kórsetýge umtylady, dep habarlaidy Úkimettiń baspasóz qyzmeti.
Basqa memleket resmi ótinish bildirgen jaǵdaida Qazaqstan dástúrli túrde gýmanitarlyq kómek kórsetedi. Ýkraina tarapynan osyndai ótinish túskennen keiin Qasym-Jomart Toqaev ýkrain halqyna gýmanitarlyq kómek kórsetý jóninde naqty tapsyrma berdi.
Úkimet janyndaǵy Halyqaralyq gýmanitarlyq kómek kórsetý máseleleri jónindegi komissiia Ýkrainaǵa jalpy quny 2 251 445 AQSh dollary bolatyn 25 túrli meditsinalyq dári-dármek jiberý týraly sheshim qabyldady.
Gýmanitarlyq kómektiń salmaǵy – 82 tonna. Qazirgi ýaqytta atalǵan júkti mejeli jerge jetkizý máselesi pysyqtalýda. Júkti Ýkraina aýmaǵyna tikelei jetkizý máselesi qaýipsizdik turǵysynan óte qiyn bolyp tur. Osyǵan bailanysty Qazaqstan Úkimeti Ýkrainaǵa jiberilgen halyqaralyq gýmanitarlyq kómekti alý jáne bólý habtary ornalasqan kórshiles memlekettermen kelissóz júrgizip jatyr.
Eske salaiyq, 7 naýryzda Toqaev Germaniia Prezidenti Frank-Valter Shtainmaiermen telefon arqyly sóilesken bolatyn. Áńgime barysynda prezidentter Ýkrainadaǵy ahýal jóninde jan-jaqty pikir almasty. Telefon arqyly bolǵan áńgime barysynda Qasym-Jomart Toqaev Qazaqstan Ýkraina halqyna dári-dármek jáne basqa da qajetti azyq-túlik jaǵynan gýmanitarlyq kómek kórsetýge daiyn ekenin jetkizgen edi.
