Memleket basshysy Túrkiia Respýblikasynyń isker toptar ókilderimen kezdesti, dep habarlaidy "Ult aqparat" Aqordaǵa silteme jasap.
Qazaqstan Prezidenti Túrkiianyń biznes ókilderi aldynda sóilegen sózinde eki memleket arasyndaǵy saýda-ekonomikalyq yntymaqtastyq oń qarqyn alyp kele jatqanyn atap ótti.
– Qazaqstan men Túrkiia arasyndaǵy qatynastar ózara dostyqqa, baýyrlastyq pen senimge negizdelgen. Saýda ainalymy jóninen Túrkiia Qazaqstannyń strategiialyq seriktesteriniń alǵashqy ondyǵyna kiredi. Eki el arasyndaǵy taýar ainalymy 2017 jyly 27 paiyzǵa ósip, 2 milliard AQSh dollaryna jýyqtady, – dedi Nursultan Nazarbaev.
Memleket basshysy investitsiialyq yntymaqtastyq pen ekonomikanyń túrli salalaryndaǵy birlesken jobalardy iske asyrý máselelerine toqtaldy. Atap aitqanda, táýelsizdik alǵannan beri elimizge Túrkiia 3 milliard AQSh dollarynan astam investitsiia quiǵanyn jáne búginde Qazaqstanda túrik kapitalynyń qatysýymen 2 myńǵa jýyq kásiporyn jumys istep otyrǵanyn atap ótti.
Sonymen qatar, Qazaqstan Prezidenti eki el kásipkerlerin qoldaýǵa baǵyttalǵan «Jańa sinergiia» baǵdarlamasynyń júzege asyrylý nátijeleri jóninde aitty.
– Osy baǵdarlama aiasynda quny 800 million dollar bolatyn 23 joba iske qosylyp, 3 myń jańa jumys ornynyń ashylýyna múmkindik berdi. Keshe elderimizdiń biznes ókilderi quny 1,7 milliard dollardan asatyn 24 kelisim-shartqa qol qoidy. Bul – bizdiń ózara senim men yntymaqtastyǵymyzdyń jarqyn mysaly, – dedi Nursultan Nazarbaev.
Kezdesý barysynda Memleket basshysy Qazaqstannyń ekonomikalyq artyqshylyqtaryna jáne elimizde biznes júrgizý úshin jasalǵan qolaily jaǵdailarǵa nazar aýdardy.
– Qazaqstanda investitsiialyq ahýaldy jaqsartý jóninde keshendi jumystar júrgizilýde. Kásipkerlikti damytý úshin zańnamaǵa tiisti ózgerister engizildi. Dúniejúzilik banktiń «Biznes júrgizý jeńildigi» reitinginde Qazaqstan 190 eldiń arasynda 36-orynda. Bizdiń memleket Ekonomikalyq yntymaqtastyq jáne damý uiymy Investitsiialyq komitetiniń múshesi bolyp sanalady, – dedi Qazaqstan Prezidenti.
Sondai-aq, Nursultan Nazarbaev Qazaqstan Respýblikasynyń Prezidenti janyndaǵy Sheteldik investorlar keńesi men «Qazaq Invest» kompaniiasynyń jumysy jáne investorlar úshin qarastyrylǵan túrli jeńildikter jóninde aitty.
– Qazaqstanda 11 arnaiy ekonomikalyq jáne 24 indýstriialyq aimaq bar. Olardyń jumysyna qatysýshylar úshin salyqtyq jáne ózge de jeńildikter qarastyrylǵan. Túrik kompaniialaryn Qazaqstanda óz biznesterin órkendetýge shaqyramyn, – dedi Memleket basshysy.
Sonymen qatar, Qazaqstan Prezidenti elimizdiń kólik-tranzit áleýetiniń múmkindikterine jan-jaqty toqtaldy.
– Qazaqstan Eýropa men Aziia arasyndaǵy transkontinentaldy mýltimodaldy júk tasymalyn belsendi damytýda. Elimiz arqyly 5 temir jol jáne 6 halyqaralyq avtomobil joly ótedi. Transkaspii mýltimodaldy júk tasymalyn damytý úshin kóp jumys atqarylýda. Aqtaý portyn jańǵyrtyp, onyń múmkindikterin keńeittik, – dedi Nursultan Nazarbaev.
Memleket basshysy Qazaqstandaǵy ónerkásip kásiporyndaryn jekeshelendirý úderisine jáne agroónerkásip keshenindegi innovatsiialyq jobalardy iske asyrýǵa sheteldik investorlardyń qatysý múmkindigi bar ekenin de atap ótti.
Sonymen qatar, Qazaqstan Prezidenti túrik biznesmenderin Nazarbaev ýniversiteti men Innovatsiialyq tehnologiialar parki bazasynda qurylǵan innovatsiialyq klasterlerdiń jumysyna atsalysyp, týristik saladaǵy birlesken jobalardy júzege asyrý múmkindikterin qarastyrýǵa shaqyrdy.
– «EKSPO-2017» kórmesiniń bazasynda «Astana» halyqaralyq qarjy ortalyǵy jumysy istei bastady. Bul ortalyq Niý-Iork, Singapýr, London jáne Dýbai qalalaryndaǵy qarjy ortalyqtarynyń úzdik modeli negizinde jumys júrgizedi. Onyń quqyqtyq mártebesi konstitýtsiialyq zańmen bekitildi, jumys tili – aǵylshyn tili. Bul – óńirdegi qyzmeti aǵylshyn quqyǵyna negizdelgen birden-bir ortalyq, – dedi Nursultan Nazarbaev.
Memleket basshysy «Astana» halyqaralyq qarjy ortalyǵynyń negizgi artyqshylyqtary jóninde aityp, bul ortalyqtyń jumysyna qatysýshylar úshin arnaiy salyq, valiýta, viza jáne eńbek rejimderi engizilgenin atap ótti.
Sońynda Qazaqstan Prezidenti eki el biznesmenderin búgingi jasalyp otyrǵan múmkindiktiń bárin paidalana otyryp, memleketaralyq bailanystardy damytý jáne nyǵaitý isine belsendi atsalysýǵa shaqyrdy.
