Kanada azamaty Kárim Baratov AQSh-ta bes jylǵa bas bostandyǵynan aiyryldy. 23 jastaǵy Qazaqstan týmasy, sondai-aq 250 myń dollar kóleminde aiyppul tóleýge mindetteldi. Bul týraly Kanadanyń CBC jańalyqtar agenttigi habarlady.
Byltyr Baratov aiyp taǵylǵan 9 tarmaq boiynsha óz kinásin moiyndady. Oǵan qamaýǵa alynǵanǵa deiin jeti jyl boiy Yahoo internet-servisi qoldanýshylarynyń esep jazbasyn buzdy degen aiyp taǵyldy.
Kanadalyq haker men onyń birneshe sybailasy Resei arnaiy qyzmetiniń tapsyrysymen esep jazbalaryn buzýmen ainalysqan. Baratovtyń advokaty onyń klientiniń naqty kimge jumys istegenin bilmeitinin málim etti.
Alǵashqyda prokýratýra Baratovty 7 jyl on aiǵa bas bostandyǵynan aiyrýdy surady. Baratovtyń advokattary jazalaý merzimin 3 jyl on aiǵa qysqartýǵa tyrysty.
Olar Baratovtyń Yahoo qoldanýshylary esep jazbalaryn buzǵanda 19 jasta ekendigin, bul qylmysqa áýestikpen barǵandyǵyna sendirdi.
Onyń advokattary Endriý Manchilla men Robert Fenton sotta klientiniń eshkimge ziian keltirgisi kelmegendigin, istegen áreketine ókinetinin málimdedi.
Derekter boiynsha, Baratov 2010 jyldan beri 11 myńnan astam qoldanýshynyń esep jazbasyn buzyp, olardyń jeke derekterin satýmen ainalysqan. Olardyń ishinde memlekettik qyzmetshiler, diplomattar, qarjy qurylymdarynyń qyzmetkerleri, kommertsiialyq kompaniialardyń akkaýnttary bar.
Baratov tutqyndalǵan kezde Kanadanyń Ontario provintsiiasynda Ankastera qalasynyń syrtyndaǵy quny 650 myń dollar turatyn úide turǵan. Ol qymbat kólikterdi tizgindegen. Onyń kollektsiiasynda Lamborghini, Porsche, Aston Martin, Mercedes jáne BMW markaly kólikter bolǵan. Jas jigit áleýmettik jelige júz dollarlyq aqsha býmalaryn ustap túsken sýretterin salǵan.
23 jastaǵy Qazaqstan týmasy 2017 jyldyń tamyzynda óz kinásin tolyqtai moiyndady. Buǵan deiin ol ózine taǵylǵan aiypty teriske shyǵaryp, Kanadadan AQSh-qa ekstraditsiialanýdan bas tartqan edi.
