Tarazdyń temirjol vokzalynyń basshysy men onyń orynbasarynyń jumys ornyndaǵy jaǵa jyrtysy úlken daýǵa ulasty. Belgili bolǵandai tóbelestiń videosy áleýmettik jelige taraǵannan keiin mekeme bastyǵy jumysynan bosatyldy, dep habarlaidy QazAqparat «Jambyl» telearnasyna silteme jasap.
Áleýmettik jelige taraǵan tóbeles qazir qyzý talqylanyp jatyr. Osy jaǵdaidan keiin «Qazaqstan temir joly» Ulttyq kompaniiasy qyzý qandy qyzmetkerin jumystan qýǵan.
Videodaǵy kadrda kabinetten dálizge shyqqan boida eki kisi alysa jóneledi. Mundaǵy qyzmetkerlerdiń aitýynsha, iri denelisi vokzal basshysy Talǵat Tólebekov. Al oǵan áli jetpei astynda qalǵan - orynbasary Maqsat Sadyǵulov eken. Jaǵa jyrtysqan basshylardy qolastyndaǵy qyzmetkerler ajyratyp álekke túsken. Biraq birinshi basshy oǵan kónbei, orynbasaryn sońynan qýyp baryp taǵy sabamaq bolady.
Tóbelesten eshkim zardap shekpegenimen, osy áreketi úshin Tólebekov ákimshilik jaýapqa tartylyp, 24 myń teńge aippul tólegen. Jáne bul jaǵdai úlken daýǵa ulasqannan keiin qyzmetinen de qýyldy.
Biraq burynǵy vokzal basshysy isti bulai qaldyrmaitynyn aitady. Ol videony áleýmetik jelige júktegenderdi sotqa bermek. Al orynbasaryn buiryqqa baǵynbai, balaǵat sózderdi aitqany úshin osylaisha sabasyna túsirmek bolǵanyn jetkizdi.
«Taraz qalasynyń vokzal ǵimaratynda bolǵan oqiǵa 22 mamyrda oryn alǵan. Kompaniia komissiia quryp tekseris ótkizdi. Nátijesinde, Taraz vokzaly basshysymen jumys shartyn úzý týraly sheshim qabyldandy», - dep keltiredi KTK telearnasy «QTJ» UQ» AQ magistraldyq jeli direktsiiasynyń vokzal sharýashylyǵy boiynsha atqarýshy direktory Juban Kórpebaevtyń sózderin.
