«Qazaqstan temir joly» ulttyq kompaniiasy poiyzdar qozǵalysy kestesiniń buzylýyna qatysty túsinikteme berdi, dep habarlaidy "Ult aqparat"
Kompaniia baspasóz qyzmetiniń málimdeýinshe, qazirgi kezde «QTJ» UK» AQ jelisinde temirjoldy jóndeý boiynsha josparly jumys júrgizilip jatyr.
«Jóndeý jumystaryna bailanysty belgili bir ýchaskede poiyzdar jyldamdyǵy kestede qarastyrylǵan jyldamdyqpen salystyrǵanda shektelýi múmkin. Búgingi tańda 84,7 shaqyrym jolǵa kúrdeli jóndeý júrgizildi. 14,6 shaqyrym jol kúsheitilgen ortasha jóndeýden ótti. 34,5 shaqyrymda rels tireýin jáne 4 shaqyrymda joltabandy jappai aýystyrý júrgizildi», delingen habarlamada.
Jumysty oryndaý kezinde aýyr tiptegi joǵary ónimdi mashinalar: Duomatic túzetý jáne qaǵý mashinasy, DGS jol turaqtandyrǵyshy, RM qiyrshyq tasty tazartý mashinasy jáne basqalary qoldanylǵan.
«2021 jyly barlyǵy 580 shaqyrymnan astam temirjol kúrdeli jóndeýden ótkiziledi. Eń kóp jumys kólemi Qaraǵandy, Jambyl magistraldyq jeli bólimsheleriniń ýchaskelerinde josparlanǵan. Infraqurylymdy jańǵyrtý qozǵalys qaýipsizdigin, jolaýshylar men júk poiyzdarynyń jyldamdyǵyn arttyrýǵa baǵyttalǵan», delingen habarlamada.
«Qazaqstan temir joly» ulttyq kompaniiasy keltirilgen qolaisyzdyq úshin jolaýshylardan keshirim surai otyryp, qalyptasqan jaǵdaiǵa túsinistikpen qaraýdy surady.
