«Qazaqstan» teleradiokorporatsiiasy «Altyn qor» saityn iske qosty. Saitta qazaqtyń ardaqty perzentteriniń videosy men daýsy, ultqa qyzmet jolyndaǵy kórnekti isteri týraly qundy derekter toptastyrylǵan, dep habarlaidy QazAqparat.
Kazmedia ortalyǵynda «Qazaqstan» teleradiokorporatsiiasynyń altynqor.com caity tanystyryldy.
Saitta Qazaq televiziiasy qoryndaǵy 1930 jyldardan bergi video jáne aýdiomaterialdar toptastyrylǵan.
Bul týraly korporatsiianyń basqarma tóraiymy Lázat Tanysbai málim etti.
«Bul - altyn qorda uzaq jyldardan beri saqtalǵan murany qyzyǵýshylyq tanytqan árbir janǵa qoljetimdi etý úshin júzege asqan joba. Saǵynyshqa ainalǵan beineler men daýystardy, mazmunyn joǵaltpaǵan habarlardy osylaisha halyqtyń igiligine qaita usynýdy jón sanadyq. Saitty qarapaiym kórermennen bólek, zertteýshi ǵalymdar úshin ashyq derekkóz retinde paidalana alady. Búginde qorda 110 myńnan astam beine jáne aýdiomaterial bolsa, onyń qatary jyl saiyn 1000 materialmen tolyqtyrylyp otyrady. Sondyqtan saitty toltyrý isi de turaqty túrde jalǵasady», - dedi Lázzat Tanysbai.
Saittaǵy muraǵat materialdar birneshe bólim boiynsha iriktelgen. Mysaly, «Beineqor» bóliminde S.Áshimbaev, Sh.Murtaza, S. Orazalin júrgizgen «Paryz ben qaryz», «Ult jáne sana», «Suhbat» baǵdarlamalary, «Tamasha», «Halyq qazynasy», «Asyl mura», «Adam izdep júrmin», «Kelesi aialdama», «Kesh jaryq», «Kúltóbe» syndy 800-den astam bólimnen turatyn 50 telehabar, «Sovettik Qazaqstan» kinojýrnaly men «Qazaqtelefilm» óndiristik birlestiginiń jobalary bar.
Al «Tulǵalar» bóliminde K.Ázirbaev, M.Áýezov, S.Muqanov, Ǵ.Músirepov, Ǵ.Mustafin, Á.Tájibaev, Sh.Jienqulova, K. Baiseiitova, Sh.Aimanov, Sh.Aitmatov, Q.Myrza Áli syndy tulǵalardyń qatysýymen ár jyldary túsirilgen beinetoptamalar qamtylǵan.
«Aýdioqor» bólimine 1954 jyldan bergi saqtalǵan M.Áýezov, S.Muqanov, I.Esenberlin, B.Soqpaqbaev, Ǵ.Músirepov syndy 100 ult qairatkeriniń ár jyldary jazylyp alynǵan daýystary, Q.Baijanov, K.Ázirbaev, Q.Babaqov, Á.Qashaýbaev, J.Elebekov, J.Kármenov, M.Eshekeev siiaqty qazaq án óneri maitalmandarynyń daýysymen jazylǵan 132 án, ár jyldary Qazaqstan tóńireginde júrgizilgen túrli ekspeditsiialardaǵy sheshendik óner jaiyndaǵy suhbattar, Batyrlar jyrynyń 50 nusqasy, 100 kúi, 100 ertegi nusqasy, «Syńsý», Besik jyry, «Jar-jar», «Betashar», «Jarapazan», Joqtaý» syndy turmystyq-ǵuryptyq ánder engizilipti.
Shara aiasynda Qazaq radiosynyń 100 jyldyǵyna orai jaryqqa shyqqan «Altyn qor. Amanat» aýdiojinaǵy tanystyryldy.
Antologiia «Dáýir úni», «Atadan qalǵan asyl sóz», «Batyrlar jyry», «Án óneri», «Kúi», «Salt-dástúr» jáne «Ertegi» dep atalatyn 7 bólimnen turady.
Aýdiojinaqtyń basty ereksheligi - usynylǵan týyndylar arnaiy flesh-kardqa jazylǵan.
Ár bólimniń sońyndaǵy QR-kod arqyly radio jáne altynqor.com saitynan jinaqtyń elektrondy nusqasyn tyńdaýǵa bolady.
