Búgin senat depýtattary Qazaqstan men Tájikstan arasyndaǵy diplomatiialyq ókildikterdiń ǵimarattaryn salý úshin jer ýchaskelerin ózara berý týraly kelisimdi ratifikatsiialady, dep habarlaidy Sputnik Qazaqstan tilshisi.
Kelisimge 2010 jyldyń tamyzynda Astana qalasynda qol qoiylǵan.
"Kelisimge sáikes tájik tarapy qazaqstandyq tarapqa QR elshiliginiń ǵimaratyn salý úshin Dýshanbe qalasyndaǵy Somoni dańǵyly birinshi diplomatiialyq qalashyqtaǵy jalpy alańy bir gektar jer ýchaskesin beretin bolady. Jalǵa berý merzimi 49 jyldy quraidy jáne jylyna bir somoni mólsherinde jaldaý aqysy tólenedi", — dedi senat otyrysynda QR Syrtqy ister ministriniń orynbasary Erjan Ashyqbaev.
Óz kezeginde qazaqstandyq tarap ta Tájikstanǵa Astanada diplomatiialyq ókildiginiń ǵimaratyn salý úshin jer beredi.
"Astanada Shámshi Qaldaiaqov kóshesiniń ońtústiginde ornalasqan jalpy alańy bir gekter jer ýchaskesin bóletin bolady. Jalǵa berý merzimi — 49 jyl, aqysy jylyna bir teńge", — dedi vitse-ministr.
Onyń aitýynsha, Qazaqstannyń jer kodeksine sáikes, basqa memleketterdiń bizdiń elimizde jer paidalaný quqyǵy QR bekitken halyqaralyq sharttarǵa sáikes júzege asyrylady.
