Parlament Senatynyń jalpy otyrysynda palata depýtattary «Bir taraptan Eýraziialyq ekonomikalyq odaq pen oǵan múshe memleketter jáne ekinshi taraptan Serbiia Respýblikasy arasyndaǵy erkin saýda týraly kelisimdi ratifikatsiialaý týraly» Zańyn qabyldady, dep habarlaidy QazAqparat.
«Qazaqstan, Belarýs jáne Reseide Serbiia Respýblikasymen erkin saýda týraly sharttar búgingi tańda qoldanylady. Biraq olar ekijaqty túrde jasalǵan. Alaida Armeniia men Qyrǵyzstan osyndai kelisimderdi jasaspady. Osy kelisimmen Eýraziialyq ekonomikalyq odaqqa bes múshe memlekettiń Serbiiamen birdei saýda rejimi ornatylady», - dedi QR Saýda jáne integratsiia ministri Baqyt Sultanov.
Jańa kelisimde Qazaqstan, Belarýs pen Reseide bajsyz saýdamen qarastyrylǵan taýarlar tizbesi ulǵaiǵan. Osylaisha, Eýraziialyq ekonomikalyq odaq elderi Serbiiaǵa irimshik, alkogol ishimdik jáne temeki taýarlaryn bajsyz jetkize alady. Osyǵan deiin bul taýarlarǵa importtyq baj salyqtary salynǵan.
Ishki naryqty qorǵaý maqsatynda Eýraziialyq ekonomikalyq odaq qus etin, qantty, matalardy, alkogol ishimdikterdi, temekini ákelýge, sondai-aq kompressorlar men motorly kólik quraldary siiaqty birqatar ónerkásip taýarlaryna importtyq baj salyqtaryn qoldanýdy saqtaidy.
«Jańa kelisim Dúniejúzilik saýda uiymynyń erejeleri negizinde ázirlengen. Atap aitqanda, taraptar sanitariialyq jáne fitosanitariialyq sharalardy, tehnikalyq retteý sharalaryn tek halyqaralyq qaǵidattar negizinde qoldanýǵa kelisti. Sonymen qatar ziiatkerlik menshik obektilerin qorǵaýǵa kepildik berýge ýaǵdalasty. Osylaisha, Serbiia Dúniejúzilik saýda uiymyna múshe bolmasa da, halyqaralyq uiymnyń erejelerin oryndaý boiynsha mindettemelerdi ózine qabyldaidy. Osy kelisimdi iske asyrý Eýraziialyq ekonomikalyq odaqqa múshe memleketterde óndiriletin taýarlardy ótkizý naryǵyn keńeitýge múmkindik beredi. Atap aitqanda, qazaqstandyq taýarlardyń Serbiiaǵa eksportyn ulǵaitý áleýeti 250 mln AQSh dollaryn quraidy», - dedi ministr.
Osy oraida himiia jáne munai-himiia, mashina jasaý ári metallýrgiia, tamaq ónerkásibi salalarynyń taýarlary, qurylys materialdary eskerilgen.
«Zań jobasyn iske asyrý respýblikalyq biýdjetten qarjy qarajatyn bólýdi talap etpeidi jáne teris áleýmettik-ekonomikalyq jáne quqyqtyq saldarlarǵa ákep soqtyrmaidy», - dedi Baqyt Sultanov.
