Qazir mektepte oqylyp júrgen Qazaqstan tarihy oqýlyǵyn Qazaq tarihy degen ataýmen qaita jazyp shyǵý kerek. Bul oidy Astanada "Uly dalanyń jeti qyry" eńbegindegi innovatsiialyq tujyrymdamalar" taqyrybynda ótken dóńgelek ústel barysynda saiahatshy, qoǵam qairatkeri Sapar Ysqaq bildirdi, dep jazady Baq.kz agenttigi.
Qoǵam qairatkeriniń pikirinshe, oqýlyqty Qazaqstan tarihy dep ataý úshin onda Qazaqstanda turatyn barlyq ulttardyń tarihy qamtylý kerek. Al qazirgi oqýlyq qazaq tarihynyń ózin durys túsindire almaidy.
"Elbasy óziniń «Uly dalanyń jeti qyry» atty maqalasynda tarihymyzǵa erekshe kóńil bólip otyr. Biz endigi jerde óz tarihymyzdy mektep jasyndaǵy balalarymyzdan bastap durys oqytýymyz kerek. Men birneshe synyptardyń Qazaqstan tarihy oqýlyǵyn oqyp shyqtym. Túrik qaǵanaty týraly maǵulmat tym az, joqtyń qasy dep aitýǵa bolady. Tonykók, Deshti qypshaq týraly da sondai. Sonda bul qandai tarih?..", - deidi Sapar Ysqaq.
Sondai-aq Sapar Ysqaq qazaq tilindegi oqýlyq pen orys tilindegi oqýlyqtyń da arasynda aiyrmashylyq bar ekendigin aitty.
"Men mektepte oqytylyp júrgen Qazaqstan tarihy oqýlyqtaryn qarap shyqtym. Bir baiqaǵanym qazaq tilindegi oqýlyqta tarihty ústirt, óte az derektermen bergen. Al orys tilindegi derekter qazaq tilindegige qaraǵanda kóbirek berilgen", - dedi qoǵam qairatkeri.
Ol sonymen qatar Dúnie júzi tarihy oqýlyǵanda da qazaqqa qatysty mańyzdy tarihy derekterdiń jazylmaǵanyn aitty.
