قازٸر مەكتەپتە وقىلىپ جٷرگەن قازاقستان تاريحى وقۋلىعىن قازاق تاريحى دەگەن اتاۋمەن قايتا جازىپ شىعۋ كەرەك. بۇل ويدى استانادا "ۇلى دالانىڭ جەتٸ قىرى" ەڭبەگٸندەگٸ يننوۆاتسييالىق تۇجىرىمدامالار" تاقىرىبىندا ٶتكەن دٶڭگەلەك ٷستەل بارىسىندا ساياحاتشى, قوعام قايراتكەرٸ ساپار ىسقاق بٸلدٸردٸ, دەپ جازادى Baq.kz اگەنتتٸگٸ.
قوعام قايراتكەرٸنٸڭ پٸكٸرٸنشە, وقۋلىقتى قازاقستان تاريحى دەپ اتاۋ ٷشٸن وندا قازاقستاندا تۇراتىن بارلىق ۇلتتاردىڭ تاريحى قامتىلۋ كەرەك. ال قازٸرگٸ وقۋلىق قازاق تاريحىنىڭ ٶزٸن دۇرىس تٷسٸندٸرە المايدى.
"ەلباسى ٶزٸنٸڭ «ۇلى دالانىڭ جەتٸ قىرى» اتتى ماقالاسىندا تاريحىمىزعا ەرەكشە كٶڭٸل بٶلٸپ وتىر. بٸز ەندٸگٸ جەردە ٶز تاريحىمىزدى مەكتەپ جاسىنداعى بالالارىمىزدان باستاپ دۇرىس وقىتۋىمىز كەرەك. مەن بٸرنەشە سىنىپتاردىڭ قازاقستان تاريحى وقۋلىعىن وقىپ شىقتىم. تٷرٸك قاعاناتى تۋرالى ماعۇلمات تىم از, جوقتىڭ قاسى دەپ ايتۋعا بولادى. تونىكٶك, دەشتٸ قىپشاق تۋرالى دا سونداي. سوندا بۇل قانداي تاريح?..", - دەيدٸ ساپار ىسقاق.
سونداي-اق ساپار ىسقاق قازاق تٸلٸندەگٸ وقۋلىق پەن ورىس تٸلٸندەگٸ وقۋلىقتىڭ دا اراسىندا ايىرماشىلىق بار ەكەندٸگٸن ايتتى.
"مەن مەكتەپتە وقىتىلىپ جٷرگەن قازاقستان تاريحى وقۋلىقتارىن قاراپ شىقتىم. بٸر بايقاعانىم قازاق تٸلٸندەگٸ وقۋلىقتا تاريحتى ٷستٸرت, ٶتە از دەرەكتەرمەن بەرگەن. ال ورىس تٸلٸندەگٸ دەرەكتەر قازاق تٸلٸندەگٸگە قاراعاندا كٶبٸرەك بەرٸلگەن", - دەدٸ قوعام قايراتكەرٸ.
ول سونىمەن قاتار دٷنيە جٷزٸ تاريحى وقۋلىعاندا دا قازاققا قاتىستى ماڭىزدى تاريحى دەرەكتەردٸڭ جازىلماعانىن ايتتى.
