Qazaqstan 10 tamyzdan bastap Tailand pen Grýziiaǵa aviareisterdi qaita jandandyrmaq. Bul týraly QR Indýstriia jáne infraqurylymdyq damý ministrligi Avtomobil joldary komitetiniń tóraǵasy Sairanbek Barmaqov aitty, dep habarlaidy QazAqparat.
«Koronavirýs indetiniń taralýyna bailanysty áýe tasymaly toqtatylǵan sátke deiin Qazaqstan 26 shet memleketpen 99 halyqaralyq baǵyt boiynsha áýe qatynasynda boldy. Osy jyldyń 1 mamyrynan bastap QR Prezidentiniń tapsyrmasyn oryndaý úshin tótenshe jaǵdai rejimin qamtamasyz etý jónindegi memlekettik komissiia aiasynda ishki aviareister kezeń-kezeńmen qaita jandandyryldy. Qazirgi kezde ishki áýe reisteri tolyǵymen qalpyna keltirilgen», - dedi komitet tóraǵasy Ortalyq kommýnikatsiialar qyzmetindegi baspasóz máslihatynda.
Sonymen qatar ol búgingi tańda 15 ishki aviabaǵdar sýbsidiialanatyndyǵyn aitty.
«Vedomstvoaralyq komissiianyń aǵymdaǵy jylǵy 11 maýsymdaǵy sheshimine sáikes ministrlik Túrkiiamen jáne Ońtústik Koreiamen Halyqaralyq aviareisterdi qaita bastaý máselesin pysyqtady. Osy jyldyń 10 tamyzynan bastap Tailand pen Grýziiaǵa aviareisterdi qaita jandandyrý josparlanýda. Ushýlar kóliktegi bas sanitar dárigerdiń qaýlysyna sáikes sanitarlyq qaýipsizdiktiń joǵary sharalary jaǵdaiynda oryndalady», - dedi Sairanbek Barmaqov.
