Foto: Qazaqstan UOK, Turar Qazanǵapov
Dál qazir Qazaqstan sportshylary Qytai astanasy - Beijińdegi XXIV qysqy Olimpiada sherýinde júrip ótti, dep habarlaidy QazAqparat.
Aq Olimpiadanyń ashylý saltanatynda elimizdiń bairaǵyn bir emes, eki sportshy alyp shyqty. Onyń biri - short-trekten Qazaqstan quramasynyń kóshbasshysy Abzal Ájiǵaliev bolsa, ekinshisi - konkishi Ekaterina Aidova.
Ekeýi de - quramadaǵy tájiribeli, júldege talasýǵa múmkindigi joǵary sportshylar.
Aita keteiik, elimizdiń atynan tý ustaýshylar qazaq halqynyń tarihi obrazdaryn somdap shyqqan. Abzal Ájiǵaliev qazaq batyryn beinelese, Ekaterina Aidova Saq hanshaiymy - Tumar hanym (Tomiris) beinesinde júrip ótti.
Komandanyń tý ustaýshylary kietin kiimde negizinen qazaqtyń ulttyq oiý-órnegi «qoshqar múiiz» beinelengen. Aita ketelik, órnek elementterin dizainerler Ábilhan Qasteev atyndaǵy Memlekettik óner murajaiymen birlesip daiyndady. Tokio-2020 Olimpiadasynda da osyndai qadam jasalǵan bolatyn.
XXIV qysqy Olimpiada oiyndaryna Qazaqstan quramasynan barlyǵy 34 sportshy qatysady, olar 87 joldama jeńip aldy.
Qazaqstandyqtar shańǵy jarysy, fristail akrobatika jáne mogýl, konkimen júgirý, short-trek, biatlon, taý shańǵysy, tuǵyrdan sekirý, shańǵy qossaiysy siiaqty 8 sport túrinen synǵa túsedi.
Aitýly synǵa álemniń 90-nan astam elinen sportshy keldi. Buǵan deiin Ońtústik Koreiada ótken 2018 jylǵy Phionchhan Olimpiadasynda 95 elden sportshylar kelgen edi.
