Qazaqstannyń birneshe qalasynda áýejai kodtary ózgertilýi múmkin. Bul týraly QR Indýstriia jáne innovatsiialyq damý ministrligi Azamattyq aviatsiia komitetiniń tóraǵasy Talǵat Lastaev aitty, dep habarlaidy QazAqparat.
«Shyn máninde NNN syndy kodtyń túrli nusqalary usynyldy. Bul kod halyqaralyq IATA uiymymen kelisiledi. Kelesi qadam - Atyraý (GUW), Aqtaý (SCO) syndy ózge qalalardyń áýejailaryndaǵy kodty ózgertý. Bul kodtar keńestik zamannan qalǵan. Osy baǵytta IATA uiymymen birlesip, jumys isteýdi josparladyq», - dedi Talǵat Lastaev elorda áýejaiynda tilshilerge bergen suhbatynda.
Onyń aitýynsha, IATA uiymynyń negizgi talaby - áýejailarǵa bir ret turaqty kod berý jáne ony ózgertpeý.
«Biz óz tarapymyzdan argýmentter keltirip, júieli túrde IATA qaǵidalaryna ózgeris engizdik. Buǵan deiingi qararda kodtyń ózgertilmeitini aitylsa, qazir belgili bir jaǵdaida ózgertýge bolatyny týraly ózgeris engizildi. Iaǵni, biz barlyq memleketterge múmkindik ashyp berdik. Olar da kórsetilgen talaptardy saqtai otyryp, kodtaryn ózgerte alady. Biz muny Qazaqstan úshin ǵana jasaǵan joqpyz», - dedi T. Lastaev.
Sonymen birge, komitet tóraǵasy kod ózgertýdegi shyǵyndar týraly aityp berdi.
«Bul ózgeris fizikalyq turǵyda esh shyǵyndy qajet etpedi. Bul - memlekettik organdardyń eren eńbegi. Ásirese QR Syrtqy ister ministrligi kóp jumys atqardy», - dedi T. Lastaev.
