Siriiadan Qazaqstan azamattaryn qaitarý arqyly bizdiń memleket gýmanitarlyq máselelermen birge, qaýipsizdik máselelerin de sheship otyr. Qaqtyǵys aimaqtarynan 47 Qazaqstan azamatynyń oralýyna qatysty belgili saiasattanýshy Erlan Qarin osyndai pikir bildirdi, dep habarlaidy QazAqparat tilshisi.
«Bul - úlken mańyzdy gýmanitarlyq is-shara. Sebebi, áskeri is-qimyldar, úlken qaqtyǵystar oryn alyp otyrǵan aimaqtan bizdiń azamattardy elge qaitarý - ártúrli mekemelerdiń birlesken qajyrly eńbegin talap etken aýqymdy is-shara boldy. Bul jumysty bizdiń tiisti organdar joǵary dárejede uiymdastyra bildi. Eń bastysy, qaqtyǵys aimaǵynan, ásirese áielder men balalardyń qaitarylýy - úlken saýapty is. Óitkeni, azamattardyń ol aimaqqa ne sebepti, qandai maqsatta barǵany bir bólek áńgime bolsa, áielder men balalar kóp jaǵdaida belgili bir jaǵdailardyń saldarynan, amaldyń joqtyǵynan, óz tańdaýynsyz, óz erikterinen tys sondai jaǵdailarǵa dýshar boldy», - deidi saiasattanýshy.
Erlan Qarinnyń aitýyna qaraǵanda, memleket tarapynyń osyndai jaǵdailarǵa túsinistikpen qarap, tez arada azamattarynyń elge qaitarylýyn qamtamasyz etýi - bizdiń memlekettiń óz azamattaryna degen jaýapkershiligin bildiredi.
«Negizinen bul sharanyń uiymdastyrylýy qai jaǵynan bolsa da, durys boldy. Sebebi, qaqtyǵys aimaǵynan azamattardy, ásirese balalardy alyp kelý - radikaldy kúshterdiń bizdiń elge qarsy áreketteri men múmkindikterin azaityp otyr. Qansha degenmen óz azamattarymyzdy elge qaitaryp, beiimdeý múmkindigine ie boldyq. Biz osylaisha, gýmanitarlyq máselelermen birge qaýipsizdik máselelerin de sheship otyrmyz», - deidi ol.
Saiasattanýshy óz sózinde atap ótkendei, qaqtyǵys bolyp jatqan aimaqtardan oralǵan azamattar belgili bir ýaqyt aralyǵynda karantinde bolady. Iaǵni olar beiimdeý ortalyqtaryna ornalastyrylady.
«Osy ýaqyt ishinde bir jaǵynan meditsina qyzmetkerleri qaitarylǵan azamattardyń densaýlyǵyna baqylaý jasaidy. Óitkeni, infektsiialar nemese ártúrli juqpaly aýrýlary barlar bolýy múmkin. Sondyqtan bir ai ishinde tiisti baqylaý jasaý kezinde qandai da bir meditsinalyq kómek qajet bolatyn bolsa, sol kómekter kórsetilip, psihologtar men teologtar, basqa da mamandardyń birlesken jumysy júrgizilýi kerek. Sodan keiin olardyń qujat máselesi bar. Olar óz eline bos qolmen kelip otyr. Keibir balalardyń kerek deseńiz, tiisti qujattary da joq. Sondyqtan, osyndai máselelermen tiisti mamandar ainalysady. Bul qai jaǵynan bolsa da, durys qadam. Árine, bul rette bizdiń arnaýly qyzmetterdiń de eńbegin atap ótý kerek. Joǵary deńgeidegi halyqaralyq operatsiianyń uiymdastyrylýy bizdiń áskeri arnaýly qyzmetterdiń biliktiligin, daiyndyqtaryn da kórsetip otyr», - deidi Erlan Qarin.
Eske sala ketsek, búgin Qazaqstan Prezidenti Nursultan Nazarbaev Qazaqstan azamattaryn Siriiadan evakýatsiialaýǵa bailanysty málimdeme jasaǵan bolatyn. Memleket basshysy óz sózinde atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan 47 azamatymyz, sonyń ishinde 30 bala elimizge qaitarylǵan.
