Qazaqstan Siriia máselesi boiynsha Jeneva alańynyń ornyn basýǵa úmitker bolmaidy. Mundai pikirdi elordada ótip jatqan Siriia jónindegi Astana protsesiniń 18-kelissózi aiasynda saiasattanýshy Sanat Kóshkimbaev aitty, dep habarlaidy QazAqparat.
«Qazaqstan qandai da bir ózge alańnyń ornyn basýǵa úmitker bolmaidy. Astanadaǵy alań Jeneva aiasynda ótip jatqan protsesti tolyqtyrady. Sondyqtan olardyń arasynda báseke joq, olar bir baǵytta sinhrondy áreket etedi. BUU-nyń arnaýly ókili Astana protsesine qatysady jáne BUU tarapynan moderatorlyq etedi. Qandai da bir aýystyrý joq. Barlyǵy da ýaǵdalasýshy taraptyń qalaýyna bailanysty. Eger olar oryn retinde Qazaqstan astanasyn tańdasa, nege bolmasqa? Olar qandai da bir basqa alańdy tańdaýy da múmkin. Qazaqstan úshin protsestiń ilgerileýi jáne jemisti bolýy mańyzdy, biraq, oryn turǵysynda emes», - degen ol Astana protsesiniń ekskliýzivti alań bolýyna Qazaqstan qarsy emestigin de atap ótti.
Aita keterligi, búgin RF Prezidentiniń Siriia jónindegi arnaýly ókili Aleksandr Lavrentev Siriia konstitýtsiialyq komitetiniń otyrysyn Jenevadan kóshirý máselesine qatysty pikir bildirgen edi.
«Biz Jenevadan Konstitýtsiialyq komitet alańyn kóshirýge múddeli ekenimizdi bildirdik. Bul rette kóp jaǵdai kepilger elderdiń tikelei sheshimine bailanysty. Másele tek tehnikalyq jáne logistikalyq sipatta ǵana emes, munyń saiasi syry da bar», - degen edi ol.
