© AP Photo / Bela Szandelszky
Qazaqstannyń shyǵysyna gaz tartý úshin Reseiden gaz importtaý múmkindigi qarastyrylyp jatyr. Bul týraly energetika ministri Bolat Aqsholaqov aitty, dep habarlaidy Sputnik Qazaqstan.
Ol Úkimet kýlýarynda Reseiden gaz importy máselesi áli qarastyrylyp jatqanyn, naqty sheshim qabyldanbaǵanyn atap ótti.
"Birinshi sebebi – tehnikalyq jaǵdaidy anyqtaý kerek. Ekinshiden baǵany kelisý qajet. Biz shyǵys pen soltústikti gazdandyrý úshin birneshe joldy qarastyryp jatyrmyz. Eń jyldam joly, árine, kórshiles Reseiden alyp kelý. Ol kóp qarajatty qajet etpeidi. Biraq onyń máselesi baǵasynda", - dedi Aqsholaqov jýrnalister suraǵyna jaýap berip.
Ministr Qazaqstan men Resei arasyndaǵy gaz salasyndaǵy yntymaqtastyq jónindegi jol kartasynda baǵa máselesi kórsetilmegenin atap ótti. Ol úshin kommertsiialyq kelissóz júrgizý qajet.
"Reseidegi áriptesterimiz gaz beretin núkteni bekitýi kerek. Barnaýyl nemese Ombydan tartyla ma, qazir olar gaz qai jerde jetkilikti, sony eseptep jatyr", - dedi Aqsholaqov.
Sondai-aq "Beineý-Bozoi-Shymkent" gaz qubyrynyń qýatyn ulǵaitqannan keiin "Saryarqa" magistraldyq gaz qubyrynyń 2-3-shi kezeńderin salý (quny 188,5 mlrd teńge) arqyly Aqmola jáne Soltústik Qazaqstan oblystaryn gazdandyrý usynylyp otyr.
"Qoldanystaǵy "Beineý-Bozoi-Shymkent" qubyry tolyq jáne qysqy mezgilde artyq oryn joq. Biraq tutynýshylardyń kólemi ósip jatyr. Olardyń bárin jabdyqtaý úshin oǵan gaz qubyry kerek", - dedi ministr.
Úkimet otyrysynda energetika ministri Bolat Aqsholaqov shyǵys óńirlerdi gazdandyrý úshin eki nusqa qarastyrylyp jatqanyn málimdegen bolatyn.
Birinshi nusqa, "Qostanai-Astana-Pavlodar-Semei-Óskemen" baǵyty boiynsha gaz qubyryn salý. Bul qomaqty qarajat salýdy (2022 jylǵy baǵamen shamamen 778 mlrd teńge), salynǵan investitsiialardyń ótemdiligin qamtamasyz etý úshin tutynýshylarǵa gaz tarifterin ulǵaitýdy, sondai-aq gaz ken oryndarynyń jańa resýrstaryn igerýge tartýdy talap etedi. Ministrliktiń boljamynsha orta eseppen 7-10 jyl qajet.
Ekinshi nusqa, Qazaqstan men Resei arasyndaǵy gaz salasyndaǵy yntymaqtastyq jónindegi jol kartasy aiasynda Resei Federatsiiasynan gaz importy.
"Búgingi tańda Qazaqgaz Gazprommen birlesip "Resei – Qazaqstan – Qytai" halyqaralyq gaz qubyryn salý máselelerin zerdeleý úshin aldyn ala TEN ázirleý máselesin pysyqtaýda", - dedi ministr Úkimet otyrysynda.
2022 jyldyń qorytyndysy boiynsha eldi gazdandyrýdyń jalpy deńgeii halyqtyń jalpy sanynyń 59%-in qurady nemese 11,6 mln adam gazǵa qol jetkizdi.
