Qazirgi ýaqytta "Qordai" shekaralyq baqylaý-ótkizý pýnktinde jolaýshylardy ótkizýge qatysty shekteýler joq. Bul týraly kaz.tengrinews.kz tilshisine qazaqstandyq taraptaǵy kezekshi shekarashy aitty.
"Shekara qyzmeti kúsheitilgen rejimge ótti, biraq jumys istep tur. Kólikter ótip jatyr. Kezek tek tańǵy ýaqytta bolady, al qazir barlyǵy durys", - dedi kezekshi.
Sondai-aq, ol Qazaqstannyń shekara qyzmetiniń de Qyrǵyzstandaǵy sailaýǵa bailanysty kúsheitilgen rejimge ótkenin aityp ótti.
Osyǵan deiin Qyrǵyzstannyń shekara qyzmetindegiler Qazaqstan shekarasyndaǵy jaǵdaiǵa qatysty túsinik bergen edi. Aita keteiik, keshe keshki ýaqyttan beri shekarada kólikter kezekte turyp qalǵan bolatyn. "Qyrǵyz Respýblikasynda prezident sailaýyna daiyndyq jáne sailaýdyń ótýine bailanysty Qyrǵyzstannyń Memlekettik shekara qyzmeti kúsheitilgen rejimge ótti", - dep habarlaǵan edi Qyrǵyzstannyń shekara qyzmetindegiler.
