QR Parlamenti Senaty Keme qatynasy týraly kelisimdi ratifikatsiialaý týraly» QR Zańyn qabyldady, dep habarlaidy "Ult aqparat"a.
«Atalǵan kelisim Eýraziialyq ekonomikalyq odaqqa qatysýshy memleketter arasynda jasaldy. Kelisimniń negizgi erejeleri, kelesige baǵyttalǵan. Birinshiden - taraptardyń ishki sý joldary boiynsha kemelerdiń tranzittik ótýine ruqsat berý tártibin jeńildetý. Atap aitqanda, kelisimde tranzittik ótýge arnalǵan ótinimdi qaraý merzimi – 10 kún jáne ruqsatty ýákiletti organ RF Kólik ministrlig bolyp belgilenedi. Kelisimge qatysýshy elderdiń ishinde kemelerdiń tranzittik júzýi tek Reseidiń ishki sý joldarymen júzege asyrylady.
Qazirgi kezde tranzittik ótýge ruqsatty Resei Federatsiiasynyń Úkimeti beredi jáne osy ruqsatty alý 3 aidan 6 aiǵa deiingi merzimdi qamtidy. Negizinen júkter Qara teńiz porttarynan qazaqstandyq Aqtaý, Quryq, Baýtino, Atyraý porttaryna Edil (Volga)-Don kanaly arqyly jetkiziledi», - dedi Senattyń jalpy otyrysynda zań jobasy boiynsha baiandamaǵan jasaǵan QR Indýstriia jáne infraqurylymdyq damý vitse-ministri Berik Kamaliev.
Onyń atap ótýinshe, Reseidiń ishki sý joldary arqyly tek qazaqstandyq kompaniialardyń jeńildetilgen tártippen ótý múmkindigi bolǵandyqtan qazirgi ýaqytta Eýraziialyq odaqqa múshe emes Kaspii mańy elderi Ázerbaidjan, Iran, Túrikmenstannyń Kaspii porttarynan Qara teńiz porttaryna júkterdi tasymaldaý úshin qazaqstandyq «Qazaqteńizkólikfloty», «OMS shipping» tasymaldaýshylardy tartýǵa daiyn ekendigin bildirip otyr.
«Bizdiń Aqtaý jáne Quryq porttarynyń Transkaspii halyqaralyq kólik marshrýty boiynsha qabilettiligi artatyn bolady. Kelisimdi qabyldaýdyń arqasynda Reseidiń ishki sý joldarymen tranzittik tasymal kólemin 2025 jylǵa qarai shamamen 250-300 myń tonnaǵa arttyrý kózdep otyrmyz, - dedi ol.
