Máskeýde «Qazaqstan jáne Resei: strategiialyq áriptestik pen jan-jaqty yntymaqtastyqtyń 30 jyly» taqyrybynda halyqaralyq ǵylymi-tájiribelik konferentsiia ótti. Osy is-sharaǵa orai QR Prezidenti janyndaǵy Qazaqstan strategiialyq zertteýler institýty direktorynyń orynbasary Alýa Joldybalina pikir bildirdi, dep habarlaidy QazAqparat.
«Biyl Qazaqstan Táýelsizdiginiń 30 jyldyq mereitoiyn atap ótedi. Iaǵni, bul jyl qorytyndy shyǵarý men ótken joldy uǵynýdyń mańyzdy kezeńi ári shebi bolmaq. Osy oraida jańa zaman tarihy Qazaqstan-Resei yntymaqtastyǵynyń qaryshty damýy men joǵary nátijeliligi ózara qurmet, teń quqylyq jáne strategiialyq áriptestik qaǵidattaryna negizdelgenin kórsetti. Bul eki eldiń kóshbasshylary, Qazaqstan Respýblikasy men Resei Federatsiiasynyń birinshi Prezidentteri N.Á.Nazarbaev pen B.N.Eltsin, QR jáne RF Prezidentteri Q.K.Toqaev pen V.V.Pýtinniń, memlekettik jáne qoǵam qairatkerleriniń, sondai-aq ǵylymi-sarapshylyq qoǵamdastyqtyń zor eńbegi», - dedi ol.
Onyń atap ótýinshe, halyqaralyq ǵylymi-tájiribelik konferentsiia jumysy eki sessiia aiasynda ótti. «Qazaqstan-Resei qarym-qatynasy: tarihtan búginge deiin» atty birinshi sessiiasynyń aiasynda eki eldiń tatý kórshilik qatynastarynyń negizi retinde halyqtar arasyndaǵy tarihi-mádeni bailanys máseleleri talqylandy. Sondai-aq, Qazaq handyǵy men Resei memleketi arasynda 16-17 ǵasyrlardaǵy qatynastardyń alǵashqy kezeńindegi diplomatiialyq bailanystar tarihyna qatystynyń máseleleri qozǵaldy. Al «HH ǵasyr jáne táýelsizdik. Qazaqstan men Resei arasyndaǵy strategiialyq seriktestik pen odaqtastyqty damytý» taqyrybyndaǵy ekinshi sessiia jumysy XX ǵasyrdyń tarihy men postkeńestik kezeńde ekijaqty qatynastardyń quqyqtyq negizderin nyǵaitýdaǵy memleketaralyq ózara árekettesýdiń turaqtylyq pen qaýipsizdik kepili máselesine, qazirgi geosaiasi protsester kontekstindegi Qazaqstan-Resei qatynastaryn taldaý suraqtaryna arnaldy.
«Halyqaralyq konferentsiia qazaqstandyq jáne reseilik ǵalymdardyń tarihi muranyń obektivti jáne teńgerimdi baǵalanýyn ilgeriletýge ári táýelsiz damýdyń jańa kezeńinde ekijaqty qatynastardyń senimdi, tatý kórshilik negizderin nyǵaitýǵa birlese atsalysý dástúrin jalǵastyrdy. Ǵylymi forým eki memleket arasyndaǵy qatynastar tarihyndaǵy «aqtańdaqty» joiý boiynsha qazaqstandyq jáne reseilik tarihshylardyń birlesken jumysynyń bastalýyna negiz bolady», - dedi Alýa Joldybalina.
Aita keteiik, QR-nyń RF-daǵy Elshiliginiń qoldaýymen ótken konferentsiiany QR Prezidenti janyndaǵy Qazaqstan strategiialyq zertteýler institýty men Resei ǵylym akademiiasynyń Shyǵystaný institýty uiymdastyrdy. Ǵylymi forým jumysyna qazaqstandyq jáne reseilik tarihshy-ǵalymdar, saiasattanýshylar, halyqaralyq qatynastar mamandary, QR jáne RF Parlamentteriniń depýtattary qatysty.
