Foto: Akorda.kz
Prezident Qasym-Jomart Toqaev jyl basynan qyzmetin bastaǵan Konstitýtsiialyq Sottyń jańa ákimshilik ǵimaratyna baryp, taǵaiyndalǵan sýdialarmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Konstitýtsiialyq Sot el ómirinde airyqsha ról atqaratyn organ ekenin atap ótip, buǵan deiin 27 jyl boiy tabysty jumys istegen Konstitýtsiialyq Keńes múshelerine jáne onda ár kezeńde eńbek etken qyzmetkerlerge alǵys aitty.
– Búginde Qazaqstan jańa dáýirge qadam basty, buryn-sońdy bolmaǵan biregei saiasi reformalar júzege asyryldy. Qazirgi tańda dúniejúzinde dál osyndai aýqymdy, mazmundy reformalar jasap jatqan el biren-saran. Bul – aqiqat. Muny búkil álem moiyndap otyr. Qazaqstan reformator memleketke ainaldy. Jalpy, elimizde kóptegen ózgeris bolyp jatyr. Azamattardyń konstitýtsiialyq quqyǵyn qorǵaýǵa basa mán berilip otyr. Bul jumysqa qoǵam ókilderi belsene qatysýǵa yntaly. Sondyqtan men Konstitýtsiialyq Sot qurý týraly bastama kóterdim. Azamattarymyz jalpyhalyqtyq referendýmda osy jáne basqa da usynystarǵa qoldaý bildirdi, – dedi Prezident.
Memleket basshysy Konstitýtsiialyq Sot barlyq zańdar men zańǵa sáikes aktilerdiń Konstitýtsiiaǵa sáikestigin qamtamasyz etýge tiis ekenine toqtaldy.
– Shyn máninde, Konstitýtsiialyq Sot – elimiz úshin óte mańyzdy institýt. Endi azamattarymyz Konstitýtsiiaǵa qaishy keletin normalardy zańsyz dep taný úshin Konstitýtsiialyq sotqa tikelei ózderi shaǵymdana alady. Sonymen qatar Bas prokýror jáne Adam quqyqtary jónindegi ýákil de Konstitýtsiialyq Sotqa júginýge quqyǵy bar. Jalpy, Prokýratýra, Sot, quqyq qorǵaý organdarynyń jumysyna qoiylatyn talap aitarlyqtai kúsheiedi. Konstitýtsiialyq Sot depýtattardyń jáne Úkimettiń zań shyǵarý jumysyna oń yqpal etedi. Bir sózben aitqanda, Konstitýtsiialyq Sot adam quqyqtaryn qorǵaý júiesiniń basty tiregine ainalady, – dedi Qasym-Jomart Toqaev.
Memleket basshysy qoǵam Konstitýtsiialyq Sottyń qyzmetinen oń ózgerister kútip otyrǵanyn, qazylardyń óz mindetin adal atqarýy halyqtyń, BAQ pen halyqaralyq qurylymdardyń jiti nazarynda bolatynyn eske saldy.
– Qazylardyń osy quramy memlekettik mańyzy zor mindetterin tabysty atqaryp, qoǵam men azamattardyń úmitin aqtaidy dep sanaimyn. Konstitýtsiialyq Sot quramyna belgili quqyqtanýshy ǵalymdar men túrli salada kóp jyldyq tájiribesi bar zańgerler kirdi. Nátijesinde teoriia men tájiribe ushtasty. Konstitýtsiialyq Sot tóraǵasy Elvira Azimova uzaq ýaqyt boiy ádilet organynda qyzmet etti, adam quqyǵyn qorǵaý máselelerimen ainalysty, sondai-aq halyqaralyq arenada memleket múddesin qorǵady. Onyń bul tájiribesi jańa salada zor paidasyn tigizedi. Konstitýtsiialyq Sot qyzmetiniń normativtik bazasy men erejelerin ázirleý boiynsha aýqymdy jumys atqaryldy. Endi Konstitýtsiialyq Sottyń qyzmeti barysynda qajettigine qarai bul bazany jetildirý kerek bolatyn shyǵar. Jalpy, jańadan qurylǵan institýt el aýmaǵynda Ata zańnyń ústemdigin qamtamasyz etýi úshin barlyq jaǵdai jasaldy, – dedi Prezident.
Memleket basshysynyń aitýynsha, zań ústemdigi qaǵidatynyń myzǵymastyǵy elimizdegi saiasi reformalardyń ózegi sanalady. Júrgizilip jatqan reformalardyń sany jaǵynan, eń bastysy, mazmuny men sapasy turǵysynan Qazaqstan álemde kóshbasshy elderdiń qataryna kiretini sózsiz.
– Shyn máninde, tek byltyr atqarylǵan jumystar bizdiń qoǵamdaǵy ózgeristerdiń aýqymy men tereńdigi týraly oń áser qaldyrmaýy múmkin emes. Qazaqstan memleket retinde aitarlyqtai jańǵyrdy. Bul derekti álemdik qoǵamdastyq ashyq moiyndady. Oǵan kóptegen halyqaralyq bailanys pen eń joǵary deńgeidegi kezdesýler dálel. Konstitýtsiialyq Sot Ádiletti Qazaqstannyń ainasy bolady desek, artyq aitqandyq emes, – dedi Qasym-Jomart Toqaev.
Memleket basshysy Jańa, Ádiletti Qazaqstannyń basty qaǵidaty – ádildik ekenine nazar aýdaryp, qazylardyń osy mańyzdy mindetti abyroimen atqaratynyna senim bildirdi.
– Halqymyz qara qyldy qaq jarǵan qazylarǵa erekshe qurmetpen, syilastyqpen qaraidy, «týra bide týǵan joq» dep sýdialarǵa zor úmit artady. Árbir sheshim Ata zańǵa sáikes qabyldanýǵa tiis. Óitkeni bul, eń aldymen, elimizdiń taǵdyryna yqpal etetin sheshimder bolmaq, – dedi Prezident.
Óz kezeginde Konstitýtsiialyq Sot Tóraǵasy Elvira Azimova Memleket basshysyna jańa organ qyzmetiniń negizgi baǵyttary men mindetteri týraly baiandady. Sondai-aq Konstitýtsiialyq sot qoǵam suranysy jáne memleket qajettiligin óteý úshin aianbai eńbek etetinine senim bildirdi.
