Nursultan Nazarbaev Qytai Halyq Respýblikasynyń Tóraǵasy Si Tszinpinmen keńeitilgen quramda kezdesý ótkizdi, dep habarlaidy "Ult aqparat" Aqordaǵa silteme jasap.
Resmi kezdesý rásiminen keiin eki eldiń kóshbasshylary keńeitilgen túrde kelissóz júrgizdi.
Qazaqstan Prezidenti Qytai tarapyna memlekettik saparmen kelýge shaqyrǵany úshin rizashylyq bildirip, dástúrli qonaqjailyq kórsetkenin atap ótti.
– Men, eń aldymen, Sizdi joǵary memlekettik laýazymǵa qaita sailanýyńyzben jáne Qytai Kompartiiasynyń HIH sezin tabysty ótkizýińizben quttyqtaimyn. Bul qytailyq ózindik ereksheligi bar sotsializm qurý jolyndaǵy álemdik máni bar aitýly oqiǵa boldy, – dedi Qazaqstan Prezidenti.
Nursultan Nazarbaev «Qytai armanyn» júzege asyrý isinde el memlekettiliginiń tiregi sanalatyn Qytai Kompartiiasy róliniń artqanyna toqtaldy.
Qazaqstan Prezidenti 2012 jyldan beri joǵary deńgeidegi 18 kezdesý ótkenin aityp, Qazaqstan-Qytai qatynastarynyń qarqyndy damyp kele jatqanyna nazar aýdardy.
– Osy ýaqyt ishinde biz jalpy somasy 67 milliard dollar kólemindegi eki jaqty 127 qujatqa qol qoidyq. Bizge osy dialogty jalǵastyrý qajet. Byltyr ózara saýda kólemi 11 milliard dollarǵa jýyqtady. Bul jerdegi ósim 30 paiyzdan astam. Eki jaqty qatynastarymyzdy ilgeriletý úshin bizdiń budan da zor áleýetimiz bar, – dedi Nursultan Nazarbaev.
Memleket basshysy Qytai Halyq Respýblikasy Tóraǵasynyń dostyq, teń quqylyq, ózara yntymaqtastyq jáne memlekettik egemendikti qurmetteý rýhynda tatý kórshilik qatynastardy dáiekti damytý isindegi jeke úlesin joǵary baǵalady.
– Sizdiń Jibek jolynyń ekonomikalyq beldeýin qalyptastyrý jónindegi bastamańyzdy iske asyrý barysynda bizdiń yntymaqtastyǵymyz nyǵaia tústi, – dedi Nursultan Nazarbaev.
Qytai Halyq Respýblikasynyń Tóraǵasy tatý kórshiliktiń úlgisine ainalǵan eki jaqty yqpaldastyqtyń joǵary qarqynmen damyp kele jatqanyna toqtalyp, birlesken infraqurylymdyq bastamalardy, sonyń ishinde «Bir beldeý, bir jol» baǵdarlamasyn iske asyrý isinde ózara senim men yntymaqtastyqtyń nyǵaiǵanyn atap ótti.
– Biz adamzattyń ortaq taǵdyryn qalyptastyrý jolynda Qazaqstanmen birge bolýǵa jáne adamzattyń jarqyn bolashaǵy úshin aqyl-oiymyz ben kúsh-jigerimizdi jumyldyrýǵa daiynbyz. Men Qazaqstan-Qytai dostyǵynyń alyp kemesin Sizben birge basqarýǵa ázirmin, – dedi Si Tszinpin.
Kelissózder barysynda Qytai tarapy Qazaqstannyń ekologiialyq turǵydan taza aýyl sharýashylyǵy ónimin óz naryǵyna jetkizýge, energetika salasyndaǵy, munai-gaz keshenindegi, sondai-aq mádeni-gýmanitarlyq bailanystar, jańa tehnologiialar men tsifrlandyrý salalaryndaǵy eki jaqty yntymaqtastyqty tereńdetýge múddelilik tanytty.
Kezdesý sońynda Qazaqstan Prezidenti Qytai Halyq Respýblikasynyń Tóraǵasyn Qazaqstanǵa resmi saparmen kelýge shaqyrdy.
***
Sapardyń nátijeleri boiynsha mynadai qujattarǵa qol qoiyldy.
1. Qazaqstan Respýblikasy men Qytai Halyq Respýblikasynyń birlesken málimdemesi;
2. Qazaqstan Respýblikasy men Qytai Halyq Respýblikasy arasyndaǵy iadrolyq jáne radioaktivti materialdardyń, radioaktivti qaldyqtar men qaýipti zattardyń zańsyz tasymaldaýyn boldyrmaý jónindegi is-qimyl týraly kelisim;
3. Qazaqstan Respýblikasy Úkimeti men Qytai Halyq Respýblikasy Úkimeti arasyndaǵy Qytai Halyq Respýblikasynyń jeńildetilgen nesie berýi týraly negizdemelik kelisim;
4. Qazaqstan Respýblikasy Qarjy ministrligi men Qytai Halyq Respýblikasy Qarjy ministrligi arasyndaǵy ózara túsinistik jáne yntymaqtastyq týraly memorandým;
5. Qazaqstan Respýblikasynyń Investitsiialar jáne damý ministrligi men Qytai Halyq Respýblikasynyń Damý jáne reformalar jónindegi memlekettik komiteti arasyndaǵy óndiristik qýattar men investitsiialar salasyndaǵy Qazaqstan-Qytai yntymaqtastyq josparyn birlesip ázirleý jónindegi ózara túsinistik týraly memorandým;
6. Qazaqstan Respýblikasy Investitsiialar jáne damý ministrligi men Qytai Halyq Respýblikasynyń Damý jáne reformalaý jónindegi memlekettik komiteti arasyndaǵy birlesken jobalar tizbesin jáne olardyń indýstriialandyrý jáne investitsiialar salasyndaǵy qalyptasý tetikterin bekitý jónindegi ózara túsinistik týraly memorandým;
7. Qazaqstan Respýblikasynyń Ulttyq ekonomika ministrligi men Qytai Halyq Respýblikasynyń Kommertsiia ministrligi arasyndaǵy elektrondyq saýda salasyndaǵy ózara túsinistik jáne yntymaqtastyq týraly memorandým;
8. Qytai Halyq Respýblikasy men Qazaqstan Respýblikasy Aýyl sharýashylyǵy ministrligi arasyndaǵy Qazaqstannan Qytaiǵa eksporttalatyn siyr etine arnalǵan inspektsiialaý, karantindik jáne veterinariialyq-sanitarlyq talaptar týraly hattama;
9. Qazaqstan Respýblikasy Aýyl sharýashylyǵy ministrligi men Qytai Halyq Respýblikasy Bas keden basqarmasy arasyndaǵy Qazaqstannan Qytaiǵa jońyshqa shóbin eksporttaý jónindegi sanitarlyq jáne fitosanitariialyq talaptar hattamasy.
