Memleket basshysyna Ulttyq bank tóraǵasy Erbolat Dosaev jáne basqarma músheleri ekinshi deńgeidegi bankter aktivteriniń sapasyn baǵalaý boiynsha ótken jylǵy qarjy-nesie saiasatyna qatysty júrgizilgen jumystardyń qorytyndylary, Ulttyq banktiń altyn-valiýta rezerviniń ahýaly jáne Ulttyq qordyń aktivteri jóninde esep berdi, – dep habarlaidy Aqorda.
Qasym-Jomart Toqaevqa Ulttyq banktiń daǵdarysqa qarsy bastamalary, 2020 jyldyń ekinshi jartyjyldyǵyna arnalǵan jospary jáne koronavirýs pandemiiasy kezindegi qarjy turaqtylyǵyn qamtamasyz etý úshin qabyldaǵan sharalary týraly baiandaldy.
Qazaqstan Prezidenti óz sózinde qazirgi jaǵdaida aqsha-nesie saiasatyn tiimdi iske asyrýdyń mańyzdylyǵyn atap ótip, 2030 jylǵa deiingi aqsha-nesie saiasatyn iske asyrý strategiiasyn ázirleý barysynda halyqaralyq naryqtaǵy irgeli úrdisterdi eskerý qajettigin aitty. Jańa Strategiia elimizdegi makroekonomikalyq turaqtylyqty qamtamasyz etip, qarjy júiesiniń ornyqty damýyna tyń serpin berýi kerek. Memleket basshysy Ulttyq bankke, Qarjy naryǵyn retteý jáne damytý agenttigine AQR qorytyndysy boiynsha Jol kartasyn júzege asyrýdy jalǵastyrýdy, otandyq bank sektorynyń sapasyna belgilengen merzim boiynsha baǵalaý júrgizýdi tapsyrdy. Prezident aiyrbas baǵamynyń turaqtylyǵyn qamtamasyz etýdi mańyzdy másele retinde atap ótti.
– Bul máselede Úkimet pen Ulttyq bank úilesimdi jumys isteýi qajet ekenin atap aitqym keledi. Kvazimemlekettik kompaniialardaǵy basy artyq valiýtany ishki naryqqa satý tájiribesin jalǵastyra berý kerek. Ulttyq bank qajet bolǵan jaǵdaida aiyrbas baǵamyn turaqtandyrý úshin qosymsha sharalar qabyldaidy, – dedi Qasym-Jomart Toqaev.
Sonymen qatar Ulttyq bankke Qarjy naryǵyn retteý jáne damytý agenttigimen birlesip, kepilsiz tutyný nesiesine qatysty máseleni udaiy baqylaýda ustaý jóninde tapsyrma berildi. Memleket basshysy qarjy uiymdarynyń jumysyn ashyq júrgizýdi mańyzdy mindet dep sanaidy. Bul másele jalǵan lombardtar men mikroqarjylyq uiymdardyń alaiaqtyq is-áreketteri údei túsýine bailanysty óte ózekti bolyp otyr.
– Lombardtar men basqa da qarjy uiymdarynyń jumysyna tekserý júrgizip, atalǵan saladaǵy jaǵdai týraly aqparat berýdi tapsyrdym. Bul jumysty jyldamdatý kerek. Tekserýlerdiń qorytyndysy negizinde Qarjy naryǵyn retteý jáne damytý agenttigine Bas prokýratýramen birlesip, atalǵan salany retteý jumystaryn júieli túrde júrgizý jáne tutynýshylardyń quqyǵyn qorǵaý jóninde usynys engizýdi tapsyramyn, – dedi Prezident.
Pandemiia kezindegi álemdik úrdister men elimizdegi jaǵdai qarjy salasyna zamanaýi tehnologiialardy engizý qajettigin kórsetti.
Osyǵan orai Qasym-Jomart Toqaev Ulttyq bankke Úkimetpen jáne «Astana» halyqaralyq qarjy ortalyǵymen birlesip, 2025 jylǵa deiingi qarjy tehnologiiasy men innovatsiiasyn damytýdyń tujyrymdamasyn bekitýdi tapsyrdy. Sonymen qatar ekonomika men bizneske belsendi nesieleý boiynsha qoldaý kórsetý – Ulttyq banktiń mańyzdy mindeti.
– Sońǵy úsh jylda ekonomikany nesieleýdiń ósimi asa baiqalmady. Bankter jumys barysynda barynsha qolaily jáne tiimdi jaǵdai usyna otyryp, árbir klient úshin belsendi kúrespeidi. Sonymen qatar qazirgi jaǵdaida bizneske qarjy resýrsy qajet jáne ony jyldam alýy kerek. Sondyqtan Qarjy naryǵyn retteý jáne damytý agenttigi Ulttyq bankpen birlesip, ekonomikany, shaǵyn jáne orta biznesti nesieleýdi arttyrý boiynsha naqty sharalar qabyldaýy qajet, – dedi Prezident.
Jiyn sońynda Memleket basshysy Ulttyq banktiń jańa qonysyndaǵy jumysyna tabys tiledi. Prezident Ulttyq banktiń kóship kelýi elordadaǵy qarjy sektoryn kúsheitip, Úkimetpen jáne «Astana» halyqaralyq qarjy ortalyǵymen aradaǵy jumysynyń úilesimdiligin arttyratyna senim bildirdi.
