Búgin Túrkiianyń biznes kapitandarymen kezdesýi barysynda Memleket basshysy Nursultan Nazarbaev olardy Túrkistandy damytýǵa shaqyrdy, dep habarlaidy QazAqparat tilshisi.
«Áleýeti zor salalardyń biri - týrizm. Bul rette ekijaqty yntymaqtastyqtyń perspektivaly baǵyttary retinde ań aýlaý, balyq aýlaý, mádeniet, bilim berý, meditsinalyq jáne basqa da týrizm túrlerin qarastyrýǵa bolady. Túrik kompaniialarynyń mol tájiribesin eskere otyryp, olardy týrizm salasyn damytýǵa edáýir úles qosady dep senemin. Onyń ústine ózderińiz bilesizder, qazir Ózbekstan men Qazaqstan arasyndaǵy, barlyǵymyzdyń aramyzdaǵy jaǵdai basqasha, durys bolyp kele jatyr. Qyrǵyzstanda Túrik keńesin ótkizdik, qarym-qatynasty jetildiremiz dep aittyq. Osyǵan bailanysty biz kóp jumys isteýimiz kerek», - dedi Nursultan Nazarbaev.
Memleket basshysy elimiz Túrkistan qalasyn oblys ortalyǵy dep jariialap, atalǵan ortalyqty jetildirý maqsatynda jumys bastap ketkenin aitty.
«Jaqynda men barlyq máselesin qaradym. Oblystyń ortalyǵy sol jerge kóship bardy, endi qurylystaryn jasaý kerek. Túrkistan barlyǵymyzdyń ortaq rýhani ortalyǵymyz. Bir jylda million týris keldi. Osyǵan Sizderdiń de kómekterińiz tiedi dep oilaimyz», - dedi Elbasy.
Nursultan Nazarbaev Qazaqstan ekonomikany jedel jańǵyrtýǵa, tehnologiialar men innovatsiialardy engizýge baǵyt alyp otyrǵandyǵyn da aitty.
«Osyǵan bailanysty barlyq salalardy qamtityn «Tsifrlyq Qazaqstan» arnaiy memlekettik baǵdarlamasy júzege asyrylýda. Innovatsiialyq klasterler jumys isteýde. Jaqynda Astanada IT-startaptardyń halyqaralyq tehnoparki ashyldy. Ol dúniejúziniń IT-kásipkerlerin jáne investorlaryn tartyp, tehnologiialyq kompaniialardy qalyptastyrýǵa yqpal etedi. Osynyń barlyǵyn tiimdi áriptestikke múmkindik beretin alań retinde qarastyramyz», - dedi Memleket basshysy.
