Memleket basshysy Qasym-Jomart Toqaev Aqordada Rim Papasy Frantsiskpen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Kezdesý aldynda Pontifikti Prezident saraiynda resmi qarsy alý rásimi boldy. Qurmet qaraýyly rotasynyń bastyǵy raport bergennen keiin eki eldiń memlekettik ánurandary shyrqaldy. Qasym-Jomart Toqaev pen Rim Papasy Qurmet qaraýylynyń aldynan ótip, ekijaqty kelissóz júrgizý úshin «Shyǵys» zalyna bardy.
Qasym-Jomart Toqaev Katolik shirkeýiniń basshysyna iltipat bildire otyryp, Qazaqstanǵa kelgeni úshin rizashylyǵyn bildirdi.
– Sizdiń Qazaqstanǵa, jalpy aitqanda, Ortalyq Aziia aimaǵyna alǵashqy apostoldyq saparyńyz meniń otandastarymdy qai dindi ustanatynyna qaramastan, zor qýanyshqa bóledi. Sizdiń bul saparyńyzdy qaiyrymdylyq pen ádildik jolyndaǵy rýhani kóshbasshylyqtyń jarqyn úlgisi retinde baǵalaimyn. Qasietti Ioann Paveldiń Qazaqstanǵa jasaǵan tarihi sapary 2001 jyly qyrkúiekte, sol jylǵy 11 qyrkúiekte búkil álemdi aýyr kúizeliske túsirgen AQSh-taǵy terrorlyq aktiden keiin boldy. Onyń simvoldyq máni zor edi, – dedi Memleket basshysy.
Prezident Rim Papasynyń sapary halyqaralyq arenadaǵy jaǵdaidyń shielenisýi men álemdegi aýyr geosaiasi ahýal aiasynda ótip jatqanyna nazar aýdardy.
Qasym-Jomart Toqaev Katolik shirkeýi basshysynyń Qazaqstanǵa kelýi jáne onyń Álemdik jáne dástúrli dinder kóshbasshylarynyń sezine qatysýy óte mańyzdy oqiǵa ekenin atap ótti. Prezidenttiń aitýynsha, Rim Papasy beibitshilik pen ózara túsinistikke shaqyratyn bastamalarǵa sebepshi bolýy múmkin.
Ózara senim men qurmet kórsetý jaǵdaiynda ótken kezdesýde Memleketimizdiń basshysy men Rim Papasy konfessiiaaralyq kelisim men dinaralyq dialogty, Qazaqstan men Vatikan arasyndaǵy yntymaqtastyqtyń damý perspektivalaryn ilgeriletýdiń ózekti máselelerin talqylady, sondai-aq qazirgi zamannyń syn-qaterleri jóninde pikir almasty.
