Qazaqstan Prezidenti Qasym-Jomart Toqaev Qatar Memleketiniń Ámiri sheih Tamim ben Hamad Ál Tánimen telefon arqyly sóilesti, dep habarlaidy Aqorda.
Memleket basshylary bir-birin qasietti Ramazan aiymen quttyqtap, Qazaqstan men Qatar halyqtarynyń ósip-órkendei berýine tilektestik bildirdi.
Taraptar ekijaqty bailanystardyń damý perspektivalaryn jan-jaqty talqylap, kópjaqty yntymaqtastyqty keńeitýge beiildi ekenin naqtylady.
Qasym-Jomart Toqaev pen sheih Tamim ben Hamad Ál Táni qazaq-qatar kooperatsiiasyn jańa mazmunmen tolyqtyrýǵa qajetti resýrstar men zor áleýet bar ekenin atap ótti.
Qazaqstan Prezidenti eki eldiń úkimetteri men isker toptary arasyndaǵy qarym-qatynastardy jandandyrýdy jáne birlesken investitsiialyq jobalardyń jekelegen tizimin jasaqtaýdy usyndy. Memleket basshysy ekijaqty yntymaqtastyqtyń basym baǵyttary retinde aýyl sharýashylyǵy, geologiialyq barlaý, taý-ken ónerkásibi, kólik jáne logistika, sondai-aq, qarjy jáne bank sektoryn atady.
Qasym-Jomart Toqaev eki el arasyndaǵy yntymaqtastyqtyń naqty baǵyttary boiynsha joǵary deńgeidegi ýaǵdalastyqtardy naqtylaý úshin Qatar Ámirin ózine yńǵaily ýaqytta Qazaqstanǵa resmi saparmen kelýge shaqyrdy.
Sheih Tamim Ál Táni Dohanyń Qazaqstanmen kópjaqty ekonomikalyq jáne investitsiialyq yntymaqtastyǵyn damytýǵa múddeli ekenin jetkizdi. Qatar Ámiriniń pikirinshe, ekijaqty bailanystardyń ózindik qozǵaýshy kúshi bolatyn birneshe iri investitsiialyq jobalardy daiyndaý kerek.
Kelissózder barysynda eki el úkimetteriniń COVID-19 indetiniń taralýyna qarsy kúreste qabyldap jatqan sharalary arnaiy sóz boldy. Qatar Ámiri COVID-19
indetine qarsy ekpe daiyndaýdaǵy qazaqstandyq ǵalymdardyń jetistikterin joǵary baǵalap, bul Qazaqstannyń óz vaktsinasyn jasap shyǵarǵan on memlekettiń jáne ǵylymi ázirlemesin tirkegen bes eldiń qataryna kirýge múmkindik bergenin atap ótti.
Áńgimelesý sońynda sheih Tamim Ál Táni Qasym-Jomart Toqaevqa Qazaqstanǵa saparmen kelýge shaqyrǵany úshin alǵys aitty.
