Qazaqstan Prezidenti Qasym-Jomart Toqaev Dúniejúzilik densaýlyq saqtaý assambleiasynyń 74-shi sessiiasynyń jabylýynda video úndeý jasady, dep habarlaidy Aqorda.
24 mamyr men 1 maýsym aralyǵynda ótip jatqan sharaǵa Dúniejúzilik densaýlyq saqtaý uiymyna múshe 194 memlekettiń delegattary qatysyp jatyr. Sessiianyń negizgi taqyryby – «Qazirgi pandemiianyń aiaqtalýy jáne aldaǵy indetterdiń aldyn alý: tiimdi, qaýipsiz ári beibit álemdi birlesip qurý».
Qasym-Jomart Toqaev Dúniejúzilik densaýlyq saqtaý assambleiasynyń sessiiasy búkil álem 1,5 jyldan beri koronavirýspen kúresip jatqan asa kúrdeli kezeńde ótip otyrǵanyna toqtaldy. Prezidenttiń aitýynsha, koronavirýs ulttyq densaýlyq saqtaý júieleri men kópjaqty institýttar úshin teńdessiz synaq boldy.
«Ǵalamdyq daǵdarys kezinde Dúniejúzilik densaýlyq saqtaý uiymy barlyq múshe memlekettermen belsendi qarym-qatynas jasady. Uiym óziniń biliktiligimen, bastamashyldyǵymen, mol tájiribesimen damýshy jáne damyǵan elderdiń indetke qarsy kúresine basshylyq etti. Ol ǵalymdardyń ǵylymi jańalyqtar ashýyna uiytqy boldy. Sonymen qatar muqtaj jandar úshin qajetti resýrstardy jumyldyrýdy shuǵyl uiymdastyrdy», – dedi Memleket basshysy.
Qasym-Jomart Toqaevtyń aitýynsha, Assambleianyń qazirgi qyzmeti jasampazdyq pen ujymdyq jaýapkershilikke negizdelgen bolashaq baǵyt-baǵdarymyzdy aiqyndaýǵa jaqsy múmkindik beredi.
Prezident keshegi men búginginiń aýyr synaqtarynan sabaq alyp, DDSU Bas direktory Tedros Adhanom Gebreiesýstiń usynysyn tolyq qoldaitynyn aitty. Bul usynystar DDSU-ny reformalaýǵa jáne ony qýatty, tiimdi ári qarjylyq turǵydan derbes halyqaralyq deńgeidegi uiym retinde transformatsiialaýǵa baǵyttalǵan.
Memleket basshysy óz úndeýinde alǵashqy meditsinalyq-sanitarlyq kómektiń mańyzdylyǵyna, atap aitqanda, 2018 jylǵy Astana deklaratsiiasyn ilgeriletýge nazar aýdardy.
Prezidenttiń pikirinshe, pandemiia alǵashqy meditsinalyq-sanitarlyq kómektiń kez kelgen juqpaly aýrýǵa tiimdi tótep beretin negizgi tetik bola alatynyn aiqyn kórsetip berdi. Osy rette Memleket basshysy DDSU-men birlesip uiymnyń Almaty qalasyndaǵy Alǵashqy meditsinalyq-sanitarlyq kómek jónindegi aimaqtyq biýrosyn kúsheitýge nietti ekenin jetkizdi.
Sóz sońynda Qasym-Jomart Toqaev Qazaqstannyń DDSU maqsattary men qaǵidattaryn sózsiz qoldaitynyn taǵy bir márte naqtylady.
