QR Prezidenti Qasym-Jomart Toqaev BUU Bas Assambleiasynyń 75 jyldyǵyna arnalǵan Joǵary deńgeidegi is-sharada beineúndeý jasady. Atalǵan shara koronavirýs indetine bailanysty onlain formatta ótti.
Osy oraida, "Ult aqparat" Memleket basshysynyń sóilegen sóziniń tolyq mátinin usynady.
* * *
Qurmetti Tóraǵa,
Qurmetti Bas hatshy,
Qymbatty áriptester, hanymdar men myrzalar!
Adamzat jylnamasyndaǵy eń joiqyn Dúniejúzilik soǵystan keiin 1945 jyldyń maýsym aiynda múldem jańa Uiymnyń qurylýy – barshamyz úshin aitýly ári tarihi oqiǵa.
Dag Hammarsheldtiń Birikken Ulttar Uiymy «bizdi jumaqqa jetkizý úshin emes, tozaqtan qutqarý úshin qurylǵan» degen qanatty sózi barshaǵa aian.
Bastapqyda BUU ujymdyq qaýipsizdikti qamtamasyz etý júiesi retinde qurylǵanymen, is júzinde álem elderin ortaq maqsat pen múddege biriktirdi. Sonyń arqasynda belsendi ári aýqymdy halyqaralyq yntymaqtastyq dáýiri ornyqty.
Árine, bul jol jeńil bolǵan joq. Ókinishke qarai, ótken 75 jyl ishinde álemdi qaiǵy-qasiretten aryltýǵa baǵyttalǵan ortaq maqsattarymyz ben qundylyqtarymyzdy ilgeriletý jolynda kóptegen múmkindikti qoldan jiberip aldyq.
Degenmen, sátsizdikten de, jetistikten de sabaq alǵan jón. BUU-nyń tereń tarihy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Atap aitqanda, otarsyzdanýdan ósip-órkendeýge, balalardy qorǵaýdan klimattyń ózgerýine, densaýlyq saqtaý isinen adam quqyǵyna, beibitshilikti qoldaýdan bitimgershilikke deiingi taqyryptar qamtyldy.
Sońǵy otyz jylda Qazaqstan BUU-nyń barlyq basty organdarynda, sonyń ishinde, Qaýipsizdik Keńesinde janjaldardy retteý, iadrolyq qarýdy taratpaý jáne qarýsyzdaný, terrorizmge qarsy kúres, konfessiiaaralyq jáne ultaralyq dialog, teńizge shyǵa almaityn damýshy elderdiń múddesin qorǵaý siiaqty basymdyqtardy dáripteýge atsalysty.
Al, endi búgingi zamannyń sipatyna zer salsaq, kóptegen jańa syn-qaterler, sondai-aq qaita etek alǵan keibir táýekelder bizdi ótken kezeńge oraltýy múmkin ekenin baiqaimyz.
Qazirgi tańda mýltilateralizm zor qaterge tap boldy. Mundai ahýal qyrǵi-qabaq soǵys aiaqtalǵannan beri týyndamaǵan edi.
COVID-19 indetin aýyzdyqtaý asa qiyn bolyp otyr. Álemde jappai qarýlaný úderisi qaitadan beleń alyp keledi. Strategiialyq damý maqsattaryn júzege asyrý isi turalap qaldy.
BUU Jarǵysynda bekitilgen murat-maqsattar budan bylai kádege aspaidy degen pikir taraýda.
Men óz elimniń Prezidenti jáne BUU-nyń burynǵy joǵary laýazymdy tulǵasy retinde bul kózqaraspen múlde kelispeimin.
Buǵan qaramastan, biz
úmit otyn óshirmei, qaita ony laýlatýymyz kerek;
ortaq murat-maqsattan bas tartpai, oǵan qol jetkizý úshin kúsh-jigerimizge tyń serpin berýimiz qajet;
anarhiiaǵa jol bermei, halyqaralyq quqyqqa negizdelgen qoǵamdastyq qurýdy jalǵastyrýǵa tiispiz.
Bul – óte kúrdeli mindetter. Aldaǵy onjyldyq 2030 jylǵa deiingi ornyqty damýdyń kún tártibinde turǵan mindetterin júzege asyrý jáne qazirgi zamanǵy daǵdarystardy eńserýdiń tiimdi jolyn tabý úshin sheshýshi kezeń bolady.
Bul aýqymdy maqsat ortaq kúsh-jigerdi jáne jaýapkershilikti talap etedi.
Biz Bas hatshy Antoniý Gýterrishtiń tabandy kóshbasshylyq qyzmetine rizashylyq bildiremiz.
Sondai-aq, onyń Birikken Ulttar Uiymyndaǵy tiimdilikti, ashyqtyq pen aiqyndyqty arttyrý jónindegi qazirgi jumysyna qoldaý kórsetemiz.
Qazaqstan BUU-nyń missiiasy men Jarǵysyn berik ustanady. Sonymen qatar, elimiz turaqty, ádiletti jáne órkendegen álem qurý jolyndaǵy ortaq mindetti júzege asyrýǵa atsalysady.
Birikken Ulttar Uiymy aýqymdy ári birden-bir ámbebap halyqaralyq uiym retinde shyn máninde balamasyz bolyp qala beretinine senimdimin.
Nazarlaryńyzǵa raqmet!
