Qasym-Jomart Toqaev pen Sadyr Japarov Qyrǵyzstan astanasyndaǵy «Teatr» gúlzarynyń ortalyq alleiasyna qoiylǵan Uly Abai eskertkishiniń ashylý saltanatyna qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy bul kúndi qazaq pen qyrǵyzdyń rýhani ómirindegi erekshe kún retinde baǵalap, Bishkek tórinde Abai eskertkishiniń boi kóterýin qyrǵyz eliniń qazaq halqyna degen airyqsha qurmetiniń belgisi dep atap ótti.
Qasym-Jomart Toqaev osy igi bastamaǵa qoldaý kórsetkeni úshin Sadyr Japarovqa zor rizashylyǵyn bildirip, bul qadam Alataýdyń bókterin qatar jailaǵan eki eldiń baýyrlastyǵyn bekemdei túsetinin aitty.
– Aǵaiyn elderdiń tamyrlastyǵyn kezinde Abai da aitqan. Uly aqyn qazaqtyń tarihyna toqtalǵan kezde qyrǵyz baýyrlardy erekshe atap ótken. Ol «Esh qazaq qyrǵyz ben qazaqtyń bir tuqymdas ekenine talaspaidy» degen. Shyn máninde, eki ulttyń tegi men tili bir, júregi men tilegi bir. Aiyr qalpaqty aǵaiynǵa bizdiń yqylasymyz qashanda erekshe. Kóp uzamai elimizde Manas eskertkishi boi kóteredi. Bul esim qazaq arasynda óte tanymal. Áigili Manasqa qurmetimiz erekshe. Manastaný ǵylymynyń negizin qalaǵan Shoqan Ýálihanov ekenin eske salǵym keledi. «Manas» jyrynyń taǵdyry tartysqa túsken kezde oǵan Muhtar Áýezov arasha túskenin bilemiz, – dedi Qazaqstan Prezidenti.
Qasym-Jomart Toqaev osynyń bárin bir-birimizge degen janashyrlyq pen tilektestiktiń kórinisi dep atap ótip, eki eldiń baýyrlastyǵy men dostyǵy eshqashan myzǵymaitynyna senim bildirdi. Sondai-aq qyrǵyz halqyna baq-bereke tiledi.
Sadyr Japarov sóilegen sózinde osy kúndi qyrǵyz-qazaq úshin mańyzdy kún dep atap ótti.
– Filosof, gýmanist tulǵa, qazaqtyń uly aqyny Abaiǵa Bishkek qalasynda qoiylǵan eskertkishtiń ashylýymen barshańyzdy quttyqtaimyn. Eki elge ortaq tulǵaǵa diplomatiiamyzdyń 30 jyldyǵy qarsańynda qurmet kórsetilip otyrǵany – erekshe oqiǵa. Jazda jailaýy, qysta qystaýy qońsy qonǵan eki halyqtyń rýhani áleminiń jaqyndyǵyn Abai men Toqtoǵuldyń, Muhtar men Shyńǵystyń muralary kórsetip keledi. Abaidyń 175 jyldyǵy kezinde Ulttyq kitaphanadan arnaiy mádeni burysh ashylǵanyn da eske salǵym keledi. Bizdiń baýyrlas qazaq halqymen dostyǵymyz barlyq salada dami beretinine senemin, – dedi Qyrǵyzstan Prezidenti.
Budan keiin Memleket basshysy Qasym-Jomart Toqaev eskertkishtiń ashylýyna jinalǵan eki eldiń ziialy qaýym ókilderimen kezdesip, pikir almasty.
