Memleket basshysy Qasym-Jomart Toqaev barsha áielder qaýymyn Halyqaralyq áielder kúnimen quttyqtady. "Ult aqparat" quttyqtaýdyń tolyq mátinin jariialaidy.
***
Qurmetti hanymdar!
Barshańyzdy Halyqaralyq áielder kúnimen shyn júrekten quttyqtaimyn!
Kóktemniń shýaqty merekesi qashanda júregimizdi súiispenshilik pen izgilikke, meiirim men shapaǵatqa bóleidi.
Biz jyl saiyn osy kúni adamzatqa ásemdik syilaityn áielder qaýymyna yqylas-iltipatymyzdy bildirip, aq tilek arnaýǵa asyǵamyz. Sizderdiń memleket jáne qoǵam ómirinde alatyn oryndaryńyz airyqsha. «Áiel bir qolymen besikti terbetse, ekinshi qolymen álemdi terbetedi» degen naqyl sóz beker aitylmaǵan.
Elimiz áielderdiń áleýetin tolyq tanytýyna jol ashyp, olardyń quqyǵyn qorǵaýǵa jáne turmys jaǵdaiyn jaqsartýǵa basa mán beredi. Memlekettiń júieli qoldaý kórsetýiniń arqasynda qyz-kelinshekterdiń ekonomikadaǵy, saiasat pen qoǵamdyq qyzmettegi róli jyl ótken saiyn arta túsýde.
Táýelsizdik kezeńinde áielderdiń túrli salada tolaǵai tabysqa jetkenine bárimiz kýámiz. Sizderdiń jetistikterińiz jurtty jigerlendirip, jańa biikterge jeteleidi, jastarǵa úlgi-ónege bolady.
Árqaisyńyzdyń belsendi azamattyq ustanymdaryńyz qoǵamdaǵy kóptegen ózekti máseleni utymdy sheshýge jáne elimizdi jan-jaqty damytýǵa yqpal etedi.
Qazaqstan áielderiniń aqyl-parasaty, erik-jigeri men jasampazdyǵy barlyq qiyndyqty eńserip, syn-qaterlerge tótep berýimizge septigin tigizýde.
Barshańyzǵa zor densaýlyq pen baq-bereke tileimin!
