Qazaqstan Prezidenti Qasym-Jomart Toqaev Aqtóbe oblysynyń jurtshylyǵymen kezdesti, dep habarlaidy "Ult aqparat" Aqordaǵa silteme jasap.
Memleket basshysy jiynǵa qatysýshylardy Aqtóbe qalasynyń aldaǵy 150 jyldyq mereitoiymen quttyqtap, búginde óńirdiń óndiristik, logistikalyq jáne tranzittik áleýeti zor ekenin aitty.
– Aimaqtyń qarqyndy damýy úshin barlyq múmkindik bar. Jergilikti kásipkerlerdiń belsendiligin atap ótý kerek. «Týǵan Jer» baǵdarlamasy aiasynda 1400-den astam joba iske asyryldy. Budan bólek, sheteldik investorlar óńirde áleýmettik nysandar salýǵa belsendi atsalysýda, – dedi Qasym Jomart Toqaev.
Qazaqstan Prezidenti halyqtyń ómir súrý sapasyn arttyrý jáne áleýmettik-ekonomikalyq ósimdi qamtamasyz etý Úkimet pen ákimderdiń negizgi mindeti ekenin aitty.
– Azamattarǵa qajetti jaǵdai jasaý barlyq deńgeidegi memlekettik organdardyń mindetine ainalýy tiis. Memlekettiń basty bailyǵy – azamattar! Olardyń tilekterin eskerip, tolǵandyrǵan máselelerin sheshý Úkimettiń negizgi qaǵidaty bolýy tiis, – dedi Memleket basshysy.
Qasym-Jomart Toqaev jurtshylyqpen kezdesýinde óńirdiń birqatar sheshilmegen máselelerin de atap ótti.
– Oblystaǵy ortasha jalaqynyń kólemi – 141 myń teńge, al respýblika boiynsha 168 myń teńge. Budan bólek, birqatar aýdan turǵyndarynyń tabys kóleminde aitarlyqtai aiyrmashylyq bar. Laiyqty jalaqy – halyqtyń ál-aýqatyna yqpal etetin mańyzdy faktor. Sondyqtan, azamattarymyzdyń tabysyn arttyrý árqashan meniń basty nazarymda bolady. Turǵyndardyń tabys kólemi oblys ákimdikteriniń jumys kórsetkishine ainalýy tiis, – dedi Qazaqstan Prezidenti.
Memleket basshysy Úkimetke jáne jergilikti atqarýshy organdarǵa sapaly ári qoljetimdi turǵyn úi salýdy, halyqtyń tabysyn arttyrýdy, iskerlik belsendilikti qoldap, orta tap qalyptastyrýdy, sondai-aq, óńirdiń kólik-tranzittik áleýetin damytý jóninde qajetti sharalar qabyldaýdy tapsyrdy.
Qasym-Jomart Toqaev el ekonomikasyndaǵy shaǵyn jáne orta biznestiń úlesin 2050 jylǵa deiin 50 paiyzǵa arttyrý týraly Elbasynyń mindettemesin eske salyp, aldaǵy bes jylda bul kórsetkishtiń 30 paiyzǵa jetýi tiis ekenin aitty.
– Oblys ákimine «Biznestiń jol kartasy – 2025» respýblikalyq baǵdarlamasynyń aiasynda júieli sharalar qabyldaýdy tapsyramyn. Biyldan bastap oǵan bólinetin qarjy 30 milliard teńgege ósti. Kásipkerler óz isin damytý úshin beriletin mikronesielerdi kedergisiz alýy tiis. Biz olarǵa jan-jaqty qoldaý kórsetip, bolashaǵy bar ár jobaǵa kóńil bólýimiz qajet, – dedi Qasym-Jomart Toqaev.
Sonymen qatar, Qazaqstan Prezidenti óńirdegi tsifrlandyrylý deńgeiiniń tómen, aýyldardaǵy internet shekteýli ekenin aityp, eldi mekenderdi damytý jóninde birqatar mindet qoidy.
– Agroónerkásip sektory – óńirdiń áleýmettik-ekonomikalyq damýynyń negizgi arqaýy. Aqtóbe oblysy – jeriniń kólemi jaǵynan elimizdegi iri óńirlerdiń biri. Ákimdik aýyl sharýashylyǵyn damytý úshin naqty jumys josparyn ázirleýi tiis. Óńir azyq-túlik qaýipsizdigin qamtamasyz etý isinde mańyzdy ról atqarýy kerek, – dedi Qasym-Jomart Toqaev.
Is-shara sońynda Qazaqstan Prezidenti kásipker B.Qalmaǵanbetovti, eńbek ardageri S.Qusaiynovany, Qazaq kameralyq horynyń kórkemdik jetekshisi ári dirijeri M.Quspanovty, Aqtóbe ferroqorytpa zaýytynyń avtokólikti paidalaný jónindegi sheberi V. Plýgindi jáne Áleýmettik qyzmet kórsetý ortalyǵynyń medbikesi L.Marsheninany alǵys hattarmen marapattady.
