Senat Tóraǵasy Máýlen Áshimbaev bastaǵan Qazaqstan Parlamentiniń depýtattary TMD Parlamentaralyq Assambleiasy Keńesiniń otyrysyna qatysty, dep habarlaidy "Ult aqparat".
Jiyn Reseidiń Sankt-Peterbýrg qalasynda ótti. Is-shara barysynda qatysýshylar – TMD elderi ulttyq Parlamentteriniń basshylary – Assambleianyń qyzmetine qatysty birqatar máseleni, onyń ishinde uiymnyń 2020 jylǵy jumysynyń qorytyndysyn talqylady.
Kún tártibinde TMD Parlamentaralyq Assambleiasynan kelgen halyqaralyq baiqaýshylardyń biyl 10 qańtarda ótken Qazaqstan Respýblikasy Parlamenti Májilisi depýtattarynyń sailaýyna júrgizgen monitoringtiń qorytyndysy boiynsha esebi de qaraldy. Otyrysta sóz sóilegen Máýlen Áshimbaev QR Parlamenti Májilisi depýtattarynyń kezekti sailaýyna halyqaralyq baiqaýshylar jibergeni úshin uiymǵa alǵys bildirdi.
«Ótken sailaý Qazaqstanda iske asyrylyp jatqan saiasi reformalar aiasynda mańyzdy kezeńge ainaldy. Bul joly tek Parlament Májilisiniń depýtattary ǵana emes, sonymen birge jergilikti ókildi organdar – máslihattardyń da depýtattary partiialyq tizimmen sailandy. Memleket basshysynyń bastamasymen alǵash ret partiialyq tizimde áielder men jastarǵa arnalǵan 30 paiyzdyq kvota qarastyryldy. Májilis qyzmetinde salmaqty quqyqqa ie bolǵan parlamenttik oppozitsiia institýty zańmen bekitildi», – dedi Máýlen Áshimbaev.
Ol aldaǵy ýaqytta da Memleket basshysynyń jańǵyrý baǵdaryn iske asyrý aiasynda Qazaqstandaǵy saiasi júieni jetildirý jumystary jalǵasa beretinin tilge tiek etti.
«Jańa shaqyrylymdaǵy Parlamenttiń aldynda sóz sóilegen Qazaqstan Prezidenti ótken sailaýdyń tájiribesin eskere otyryp, saiasi partiialardyń Májiliske ótý shegin 7-den 5 paiyzǵa tómendetýdi usyndy. Mundai qadam eldegi saiasi básekelestiktiń damýyna yqpal eteri sózsiz. Azamattardyń sailaý quqyǵyn qorǵaýǵa tiisti jaǵdai jasaý úshin barlyq deńgeidegi sailaý biýlletenderine «bárine qarsymyn» degen jazý engiziletin boldy», – dedi Máýlen Áshimbaev.
Sonymen qatar otyrysqa qatysýshylar Assambleia janyndaǵy Ekonomika jónindegi saraptamalyq keńestiń jumysyn jáne Dostastyqtyń 2030 jylǵa deiingi ekonomikalyq damý strategiiasyn iske asyrý mindetterin talqylady.
TMD elderi Parlamentteriniń basshylary pandemiiadan keiingi kezeńde elderimizdiń ekonomikasyn qalpyna keltirýge osyndai birlesken jumystar tyń serpin beretinine senim bildirdi.
Odan bólek, Máýlen Áshimbaev Sankt-Peterbýrgke jumys sapary barysynda birqatar ekijaqty kezdesýler ótkizdi.
Ózbekstan Olii Majlis Senatynyń Tóraiymy Tanzila Narbaevamen kezdesýde eki jaq Qazaqstan-Ózbekstan qarym-qatynasyn odan ári damytý máselelerin sóz etti. Áriptester Qazaqstan Prezidenti Qasym-Jomart Toqaevtyń 2019 jyldyń sáýir aiynda Ózbekstanǵa memlekettik sapary kezinde jasalǵan kelisimderdiń jáne Tanzila Narbaevanyń 2019 jylǵy qarasha aiynda Qazaqstanǵa resmi sapary kezinde qol qoiylǵan Yntymaqtastyqtyń jol kartasyndaǵy tarmaqtardyń barlyǵy derlik iske asyrylǵanyn erekshe ekpinmen atap ótti. Sondai-aq, Máýlen Áshimbaevtyń biylǵy jazǵa josparlanǵan Ózbekstanǵa sapary da eki eldiń yntymaqtastyǵyn arttyrýǵa óz septigin tigizetini aityldy.
«Bizdiń memleketterimizdiń arasyndaǵy tyǵyz, jan-jaqty jáne ózara senimge negizdelgen qarym-qatynas eki eldiń ulttyq múddelerine tolyq sai keledi. Qazirdiń ózinde ekijaqty bailanys aiasynda kóp sharýa atqaryldy. Eki eldiń Prezidentteri memleketaralyq bailanystarymyzdyń erekshe qarqynmen damýyna bar jaǵdaidy jasap keledi. Qazaqstan Parlamentiniń Senaty yntymaqtastyqty ári qarai arttyrýǵa jáne bul baǵytta belsendi jumys júrgizýge daiyn», – dedi Máýlen Áshimbaev.
Resei Federatsiiasy Federaldyq Jinalysy Federatsiia Keńesiniń Tóraiymy Valentina Matvienkomen kezdesýde qatysýshylar Qazaqstan men Resei arasyndaǵy parlamentaralyq yntymaqtastyqtyń damý deńgeiine joǵary berdi jáne osy bailanysty ári qarai nyǵaitýǵa tolyq múmkindik bar ekenine nazar aýdardy.
«Qazaqstan men Reseidiń memleketaralyq yntymaqtastyǵynda bizdiń parlamentaralyq bailanysymyzdyń mańyzy zor. Elderimizdiń ósip-órkendeýi kóp jaǵdaida tatý kórshilik, syndarly jáne ózara tiimdi qarym-qatynasqa bailanysty», – dedi Qazaqstan Senatynyń Spikeri.
Budan basqa taraptar Qazaqstan men Reseidiń ekijaqty kún tártibindegi birqatar máselege kóńil bóldi.
Máýlen Áshimbaev pen Ázerbaijan Respýblikasy Milli Medjlisiniń Tóraiymy Sahiba Gafarova kezdesýinde elderimiz arasyndaǵy parlamentaralyq yntymaqtastyq pen ózara tiimdi qarym-qatynasty odan ári nyǵaitý máseleleri keńinen sóz boldy. Qazaqstan delegatsiiasynyń basshysy áriptesin Taýly Qarabaq qaqtyǵysynyń aiaqtalýymen quttyqtap, elimizdiń atalǵan óńirdiń infraqurylymyn qalpyna keltirýge qatysý nietin taǵy bir ret rastady. Odan bólek, eki tarap pandemiiadan keiingi kezeńde saýda-ekonomikalyq yntymaqtastyqty jandandyrýǵa senim bildirdi.
Sondai-aq, Máýlen Áshimbaev Armeniia Respýblikasy Ulttyq jinalysynyń Tóraǵasy Ararat Mirzoianmen ekijaqty kezdesý ótkizdi. Sonyń barysynda elderimiz arasyndaǵy saýda-ekonomikalyq jáne mádeni-gýmanitarlyq qarym-qatynastar pandemiiaǵa qaramastan qarqyndy damyp kele jatqany aityldy.
