Qazaqstan Ózbekstan naryǵyna jańa 64 taýar túrin shyǵarýǵa nietti. Bul týraly QR Saýda jáne integratsiia ministri Baqyt Sultanov óziniń Facebook-tegi paraqshasynda jazdy.
«Premer-Ministrdiń orynbasary Roman Skliardyń tóraǵalyǵymen Tashkentte Qazaqstan-Ózbekstan arasyndaǵy ózara saýda ainalymyn arttyrý jáne yntymaqtastyqty keńeitý týraly kezdesý ótkizdik. Biz úshin Ózbekstan aimaqtaǵy negizgi saýda seriktesi. Aǵymdaǵy jyly ózara taýar ainalymyn 5 mlrd dollarǵa deiin jetkizýdi josparlaǵan bolatynbyz. Degenmen, pandemiiaǵa bailanysty bul kórsetkishke qol jetkizý qiyn. 9 aida eki el arasyndaǵy saýda ainalymy 16,5%-ǵa tómendedi. Bul salada Qazaqstan eksporty az kólemde zardap shekti, al Ózbekstan importy 40%-ǵa tómendedi.
Kelissózder barysynda Qazaqstan tarapy Ózbekstan naryǵyna jańa 64 taýar túrin shyǵarý týraly usynys bildirdi. Olar ártúrli qubyrlar, metall prokaty, avtomobilder, himiia jáne munai-himiia ónimderi, mashina jasaý, farmatsevtika, sondai-aq tamaq ónerkásibi salasyndaǵy taýarlar. Bul baǵyttaǵy jumystardyń júieli damýyna ótken jyly Tashkentte ashylǵan «KazakhExport» keńsesi kómektesedi dep senemin», - dep atap ótken QR Saýda jáne integratsiia ministri Baqyt Sultanov. Ministrdiń málimdeýinshe, «KazakhExport» kompaniiasy óziniń saqtandyrý quqyǵyn paidalana otyryp, qazaqstandyq taýarlardy satyp alý úshin jergilikti bankterden eksportqa qajetti qarjy ala alady.
«Kezdesý aiasynda «KazakhExport» pen ózbekstandyq «Kishlok kýrilish bank» arasynda 3 mln dollarǵa deiin saýda operatsiialaryn qarjylandyrýdy kózdeitin kelisimge qol qoiyldy.
«Biraq biz tek saýda jasap qana qoimai, birlese syrtqy naryqtarǵa shyǵý joldaryn da qarastyramyz. Bul úshin eki el Halyqaralyq saýda-ekonomikalyq yntymaqtastyq ortalyǵyn qurýǵa bastamashy boldy. Degenmen, ortalyqtyń jumysy bastalǵanǵa deiin biz onyń keibir elementterin shekaralyq kóterme-taratý ortalyqtarynan synaqtan ótkizýdi usynamyz. Halyqaralyq saýda-ekonomikalyq yntymaqtastyq ortalyǵy iske qosylǵan sátte taýarlar qozǵalysynyń barlyq tehnologiialyq shemasyn jasap, osal tustardy anyqtap, olardy tez arada túzete alamyz. Sondai-aq, «jasyl dáliz» qaǵidaty boiynsha taýarlardyń tranzittik qozǵalysyn qamtamasyz etý úshin ótkizý beketterinde fito-sanitariialyq baqylaý, kedendik rásimder men ózge de qajetti sharalar júrgizý júiesin damytý mańyzdy. Bul úshin barlyq shekara mańy qyzmetterinde HQKO-nyń júiesine uqsas ortalyqtandyrylǵan júie qajet», - deidi Baqyt Sultanov.
Sonymen qatar, kelissóz barysynda Qazaqstan tarapy Ózbekstandy aktsizdik saiasatty retteitin 2009 jylǵy 20 qarashadaǵy TMD elderinde shyǵarylatyn taýarlardy aiqyndaý týraly erejege qosylýǵa shaqyrdy. Sebebi ózbek naryǵynda qazaqstandyq brendterdi jamylyp, kontrafaktilik un ónimderin tartý oqiǵalary jii oryn alady.
