Búgin Horezm oblysynyń Úrgenish qalasynda QR Premer-Ministri Asqar Mamin ÓR Premer-Ministri Abdýlla Aripovpen kelissóz ótkizdi. Bul týraly QazAqparat primeminister.kz silteme jasap habarlaidy.
Sondai-aq, Asqar Mamin Qazaqstan men Ózbekstannyń aimaqaralyq yntymaqtastyǵynyń II forýmyna qatysty.
«Bizdiń kóshbasshylarymyzdyń saiasi kóregendiliginiń arqasynda Qazaqstan men Ózbekstan arasyndaǵy strategiialyq áriptestik sapalyq turǵyda jańa deńgeige jetti», — dedi A. Mamin.
Qazaqstan Úkimetiniń basshysy ekijaqty saýda ainalymyn odan ári ulǵaitý boiynsha qol jetkizilgen ýaǵdalastyqtar qazirgi ózara múddelerdi belsendi júzege asyrý jáne jańa baǵyttaryn izdestirý qajettigin kórsetip otyrǵanyn aitty.
Kezdesý barysynda saýda-ekonomikalyq, investitsiialyq, aýyl sharýashylyǵy, tranzittik-kólik, sý-energetikalyq, toqyma, mashina jasaý, týristik, ekologiialyq salalarda, sondai-aq qarjy tehnologiialary men aimaqaralyq yntymaqtastyq salasyndaǵy ekijaqty yntymaqtastyqty ári qarai damytý keleshegi talqylandy.
A. Mamin men A. Aripov «Agroónerkásiptik kooperatsiia, ónerkásip jáne týrizm salasyndaǵy aimaqtyq biznestiń yntymaqtastyǵy» taqyrybyndaǵy QR men ÓR Aimaqaralyq yntymaqtastyǵynyń II forýmynyń qorytyndy otyrysyna qatysty, sharaǵa 300-den asa adam — memlekettik organdardyń, óńirlerdiń basshylary men eki eldiń iskerlik orta ókilderi jinaldy.
QR Premer-Ministri Shymkent qalasyndaǵy «Ońtústik» AEA bazasynda jeńil ónerkásip boiynsha Qazaqstan-Ózbekstan klasterin qurý, Túrkistan, Tashkent, Samarqan, Buhara jáne Horezm oblystaryndaǵy týristik nysandar boiynsha birlesken týristik baǵyttar ashý, kóterme-taratý jáne agro-logistikalyq ortalyqtardy birlesip damytý boiynsha bastamalar kóterdi.
A. Mamin eki eldiń tranzittik-kólik jáne logistikalyq salalardaǵy yntymaqtastyǵyna erekshe nazar aýdardy.
«Qazaqstan úshin sizdiń el – Ońtústik Aziiaǵa shyǵý joly, Ózbekstan úshin bizdiń aýmaq – EAEO jáne Ońtústik-Shyǵys Aziia, Kavkaz ben Eýropa elderiniń naryǵyna shyǵý múmkindigi «, — dep A. Mamin, «Soltústik-Ońtústik» dáliziniń infraqurylymyn qalyptastyrý, sondai-aq Transkaspii halyqaralyq kólik baǵytyn damytý boiynsha birlesken is-qimyldy jandandyrý qajettigin atap ótti.
Forým sońynda ekonomikalyq yntymaqtastyqty damytý týraly 52 qujatqa, onyń ishinde Forýmnyń Qorytyndy deklaratsiiasyna, sondai-aq mashina jasaý, aýyl sharýashylyǵy, qarjy-bank, ónerkásip, infraqurylym, farmatsevtika jáne basqa da salalarda jalpy somasy $500 mln jýyq bolatyn vedomstvoaralyq, aimaqaralyq jáne kommertsiialyq kelisimderge qol qoiyldy.
Forým eki eldiń iskerlik orta ókilderine B2B (business-to-business) formatynda kezdesýler ótkizip, arnaiy uiymdastyrylǵan kórmede ózderiniń óndiristik jáne investitsiialyq múmkindikterin pash etýge múmkindik berdi.
