Qazaqstan ótken jyly 68,5 mln tonna munai eksporttady. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«2020 jyly munai jáne kondensat óndirý kólemi 85,7 mln tonnaǵa jetip, esepti jyldyń josparymen salystyrǵanda 101 paiyz boldy. Respýblika boiynsha 2020 jyly munai óndirý 90 mln tonnadan 85,7 mln tonnaǵa deiin tómendetildi. Koronavirýstyń taralýyna jáne kóptegen elderdegi qatań shekteý sharalaryna, álemde munai men munai ónimderin tutynýdyń tómendeýine, munai men munai ónimderiniń tez jinalyp, álemdik munai qoimalarynyń tolyp ketý táýekelderine bailanysty 2020 jyly Úkimet munai óndirý boiynsha shekteý sharalaryn iske asyrdy. Sonymen qatar, OPEK + elderi, munai óndirýdi shekteý boiynsha osyndai sharalardy qabyldady», - dedi ministr.
Onyń aitýynsha, atalǵan sharalardyń arqasynda álemdik munai naryǵynda usynys pen suranys tepe-teńdigin birtindep qalpyna kelýi baiqalady. Munaidyń baǵa belgilenimderi bir barrel úshin 18 dollardan 50 dollarǵa deiin turaqtaldy.
Sonymen qatar ol ótken jyly elimizdiń munai-gaz salasyndaǵy iri kompaniialar óndirgen munai kólemine toqtaldy.
«TShO-da atalǵan kezeńde 26,4 mln tonna munai óndirildi. Bul esepti jyldyń josparyna 100 paiyz. NKOK-ta munai óndirý kólemi – 15,1 mln tonna, iaǵni 2020 jyldyń jospary 100 paiyz oryndaldy. KPO-nyń kórsetkishi 12 mln tonnany qurap otyr. 2020 jyldyń josparymen salystyrǵanda 103 paiyz óndirildi. Esepti kezeń ishinde 68,5 mln tonna munai eksporttaldy. Bul esepti jyldyń josparymen salystyrǵanda 101,8 paiyzǵa oryndalǵan», - dedi Nurlan Noǵaev.
