Qazaqstannyń BUU janyndaǵy Turaqty ókili Maǵjan Iliiasov ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamany ratifikatsiia jóninde qujatty BUU depozitariiine saqtaýǵa tapsyrdy, dep habarlaidy QazAqparat Syrtqy ister ministrligine silteme jasap.
Bul qadam elimizdiń adam quqyqtaryn qorǵaýǵa jáne osy saladaǵy óziniń halyqaralyq mindettemelerin oryndaýǵa degen berik beiildiligin rastaidy.
Qazaqstan hattamaǵa qosylǵan BUU-ǵa múshe 193 memlekettiń ishinen 90-shy memleket boldy.
Qazaqstannyń osy halyqaralyq qujatqa qosylý jolyndaǵy alǵashqy qadamy onyń 2020 jylǵy 23 qyrkúiekte Niý-Iorkte qol qoiýy boldy. Sodain keiin, 2021 jylǵy 2 qańtarda QR Prezidenti Qasym-Jomart Toqaev osy qujatty ratifikatsiialaý týraly Zańǵa qol qoidy.
Hattama erejelerine sáikes eldiń ulttyq qylmystyq zańnamasyn hattama normalaryna sáikes keltirý talap etildi.
2021 jylǵy 29 jeltoqsanda Memleket basshysy «Qazaqstan Respýblikasynyń keibir zańnamalyq aktilerine ólim jazasyn joiý máselesi boiynsha ózgerister men tolyqtyrýlar engizý týraly» Zańǵa qol qoidy.
Osylaisha, ekinshi Fakýltativtik hattamaǵa qosylý Qazaqstanda ólim jazasynyń tolyq joiylýyn bekitip, qylmystyq zańnamany jalpy izgilendirý baǵytyn jalǵastyrdy.
Ólim jazasyn qoldaný Qazaqstan Respýblikasynda QR Prezidentiniń 2003 jylǵy 17 jeltoqsandaǵy tiisti moratorii engizý týraly Jarlyǵymen toqtatyldy.2022 j. 16 naýryzda Qazaqstan halqyna jasaǵan «Jana Qazaqstan: jańarý men jańǵyrý joly» atty joldaýynda Memleket basshysy Qasym-Jomart Toqaev «ólim jazasyna tyiym salý týraly sheshimdi birjola bekitý úshin Konstitýtsiiaǵa tiisti ózgeris engizý qajet» degen usynys jasaǵan bolatyn.
