Qazaqstan Niý-Iorkte turaqty damý maqsattaryna qatysy esebin tanystyrady - Mamin

HII Astana ekonomikalyq forýmy aiasynda Turaqty damý maqsattary jónindegi birinshi qazaqstandyq forým ótip jatyr, dep habarlaidy QazAqparat tilshisi.

«Qazaqstan aýmaǵynda turaqty damý maqsattaryna arnalǵan forým alǵash ret ótip otyr. BUU múshelerimen bilim jáne ideia almasý Astana ekonomikalyq forýmynyń turaqty bóligine ainalaryna úmittenemin. Osy múmkinshilikti paidalanyp, BUU Bas hatshysynyń orynbasary Armida Salsiia Alishahbana hanymǵa barlyǵymyz úshin de turaqty ári sapaly bolashaq qurýǵa baǵyttalǵan kúsh-jigeri úshin rizashylyǵymdy bildiremin», - dedi sharanyń ashylýynda  QR Premer-Ministri Asqar Mamin.

Osy rette Asqar Mamin QR Úkimeti álemdegi ekologiia sapasy, teńdigi máselelerinde BUU-ǵa tolyqtai qoldaý kórsetetinin aitty. Qazaqstannyń álemniń eń damyǵan 30 eliniń qataryna kirý jolynda adami damý jónindegi esepte aitarlyqtai jetistikke jetkenin atap ótti. Búginde elimiz 198 eldiń ishinde 58-orynǵa turaqtaǵanyna nazar aýdartty. 

Sonymen qatar QR Premer-Ministri Qazaqstan men Ortalyq Aziiada jasyl investitsiia jáne ony júzege asyrý úshin múmkinshilikter jasap, tehnologiialyq sheshimderdi damytý investitsiialyq jobalarǵa arnalǵan negiz ekenin aitty.

«Qazaqstan álemniń jahandyq indeksinde 17-orynǵa turaqtady. Turaqty damý maqsattarynyń jáne olarǵa qatysty bastamalardyń basym bóligi bizdiń strategiialyq qujattarymyzben barynsha yqpaldastyrylǵan. Úkimet BUU-nyń turaqty damý maqsattary aiasyndaǵy bastamalaryna da jan-jaqty qoldaý kórsetedi. Turaqty damý maqsattaryn engizýdiń alǵashqy ailarynyń birinshi erikti esebin Niý-Iorkte saiasi deńgeide usynbaqpyz», - dedi A.Mamin.

Sondai-aq, ol investitsiialar - Qazaqstannyń ekonomikasynyń damýy men ósiminiń irgeli faktory eken atady.

«Investitsiialar - bizdiń ekonomikanyń damýy men ósiminiń irgeli faktory bolyp qala beredi. Táýelsizdik alǵan jyldardan beri Qazaqstan ekonomikasyna 300 mlrd dollar investitsiia tartylǵan. Bizdiń bul jetistikterimiz - aimaqtaǵy básekege qabiletti ári iri ekonomikaǵa ie bolýǵa múmkindik berdi. JIÓ ótken jyly 4 paiyzǵa ósti. Syrtqy saýda 20 paiyzǵa artyp, onyń áseri eksport kólemin 26 paiyzǵa arttyrýǵa septigin tigizdi. Osy qarqyndy saqtai alsaq, jyldyń sońyna deiin ekonomikalyq ainalym 100 mlrd dollarǵa jetip qalýy kerek», - dedi Úkimet basshysy AEF aiasynda elordada ótken Jahandyq investitsiia boiynsha ótip jatqan dóńgelek ústelde.

Asqar Maminniń aitýyna qaraǵanda, 2018 jyly ǵana Qazaqstanǵa 24 mlrd dollar sheteldik kapital quiylǵan.

Bul Ortalyq Aziiaǵa salynǵan tikelei investitsiianyń 90 paiyzyna teń ekenin atap ótý kerek. «Investitsiialar men negizi kapital da birshama ósimdi kórsetip, 20 paiyzǵa nemese 30 mlrd dolllarǵa artty. Osy dinamikany saqtai bilý úshin álemdik jaǵdailardy eskere otyryp, halyqaralyq kapitaldyń kóptep quiylýy úshin birshama shara qabyldaý kerektigin túsinip otyrmyz. Mine, osy máselelerdi esepke ala otyryp, investitsiialyq saiasatqa jańa tásil engizdik. Ol amaldar áleýetti investorlardy jan-jaqty qoldaýǵa negizdelgen», - deidi ol.

Úkimet basshysy óz sózinde «Astana» halyqaralyq qarjy ortalyǵy sheteldik tikelei investitsiialardy tartýda sheshýshi rólge ie bolatynyn tilge tiek etti.

«Biz qalyptastyryp otyrǵan qarjylyq jáne investitsiialyq ekojúie Qazaqstandy aimaqtyq jáne halyqaralyq qarjylyq ortalyq etýge jol ashary daýsyz. Shikizattyq emes sektorǵa investitsiia salý júiesin jeńildetý úshin biz Sheteldik tikelei investitsiialar qoryn qurdyq. 1 mlrd dollarlyq kapitalizatsiiamen qor qarjylyq resýrstaryn keleshegi mol eksporttyq salalarǵa baǵyttai otyryp, jergilikti naryqtaǵy aktsiialardyń damýyna negiz bolady», - deidi Asqan Mamin.

Sóz sońynda QR Premer-Ministri sheteldik investorlardy Qazaqstan naryǵynda jumys isteýge shaqyrdy.

«Qazaqstan investitsiialyq saiasattyń mańyzyn eskere otyryp, Premer-Ministrdiń jumysyna investitsiialyq ombýdsmen mindetin júktedi. Sheteldik bizneske tájiribe úiretý maqsatynda sheteldik tikelei investitsiialar boiynsha Úilestirý keńesi quryldy. Keńes investitsiialyq jobalardy iske asyrý protsesi kezinde másele týyndasa, sheshim izdeitin bolady. Aqyrynda, jeke sektorǵa negizdelgen ekonomikalyq ósimniń berik modelin qurǵymyz keledi», - dedi Asqar Mamin AEF aiasynda ótken Jahandyq investitsiia boiynsha dóńgelek ústelde.

Úkimet basshysy óz sózinde memlekettik aktivterdi keń aýqymda jekeshelendirý jumystary ekonomikadaǵy óndiris deńgeiin arttyryp, áleýetti investorlar men kásipkerler úshin qosymsha múmkindik ashatynyn tilge tiek etti.

«Osynyń nátijesinde ekonomikadaǵy memlekettiń úlesin 2020 jylǵa deiin 17 paiyzdan 15 paiyzǵa azaitsaq deimiz. Instýtsionaldyq orta qurý baǵytyndaǵy jumsaǵan jigerimiz Qazaqstandy aimaqtaǵy biznes úshin jaily memleketterdiń biri retinde tanytty. 2018 jyly Doing Business esebi boiynsha biz 190 eldiń ishinde 28-shi orynǵa turaqtadyq. Infraqurylym men kóliktik shyǵyndardyń mańyzyn túisine kele avtokólik jáne temir joldardyń sapasyn arttyryp kelemiz. «Nurly jol» infraqurylymdyq baǵdarlamasynyń bul protseste mańyzy óte zor.

Biz aimaq jáne álem boiynsha biznes qurýǵa bolatyn eń jaily sharttardy usynamyz. Tutynýshylary jetkilikti EAEO-nyń dinamikalyq áleýeti zor. Osy sátti paidalana otyryp, áriptesterimizdi jáne dostarymyzdy Qazaqstanǵa investitsiia salý múmkindikterin zertteýge shaqyramyz», - dep túiindedi Úkimet basshysy.