Qazaqstan Mysyrǵa resmi narazylyq notasyn jiberdi. Bul týraly búgin QR Syrtqy ister ministrligi baspasóz qyzmetiniń jetekshisi Ánýar Jainaqov málim etti, dep habarlaidy "Ult aqparat".
«Ózderińiz de biletindei, Kair qalasynda Qazaqstannyń 6 azamatynyń joǵalyp ketkenine 12 kún boldy. Qolda bar senimdi málimetterge sáikes, 19-nan 20-shy shildege qaraǵan túnde olardy Mysyrdyń arnaiy qyzmet saqshylary ustap, alyp ketken. Osy ýaqytqa deiin Mysyr tarabynan Qazaqstan azamattarynyń ustalý sebepteri, olardyń qazir qaida ekendigi týraly resmi aqparat alǵan joqpyz. Mysyrdyń SIM basshylyǵymen, quqyq qorǵaý organdarynyń ókilderimen birneshe ret bolǵan kúndelikti kelissózder nátije bergen joq», - dedi ol.
QR SIM ókiliniń aitýynsha, taiaýda Qazaqstannyń Kairdaǵy Elshisi Mysyrdyń Joǵary konstitýtsiialyq sotynyń tóraǵasymen jáne Prezidenttiń ulttyq qaýipsizdik jónindegi kómekshisimen Qazaqstan azamattaryna qatysty ahýaldy talqylaǵan.
«Olardyń bizdiń azamattarymyzdyń ustalý mán-jaiyn anyqtaýǵa kómek kórsetemiz degen ýádesine qaramastan jaǵdai ózgergen joq. Osyǵan orai Mysyrdyń Syrtqy ister ministrligine resmi narazylyq notasy jiberildi. Osyndai nota Qazaqstandaǵy Mysyrdyń ýaqytsha senimdi ókiline de tabys etildi. Biz Mysyrdyń resmi biliginen Qazaqstan azamattarynyń ustalý sebepterin túsindirýdi, Qazaqstannyń Mysyrdaǵy Elshiligi diplomattarynyń, konsýlynyń olarmen bailanysýyna múmkindik berýin batyl túrde talap etemiz»,- dedi Jainaqov.
